"پێویستە بەڕێوەبەری شارەکان بۆ هەموو قەیرانێک ئامادە بن و گریمانەى ئەوە هەیە لە مانگی بەفرانبار ڕووداوی گەورەتر ڕوو بدات"، ئەمە لێداونى موحسێنی هاشمی سەرۆکی ئەنجوومەنى شارى تارانە.
موحسێنی هاشمی لە ساتى باسکردنى قەیرانەکانی ساڵانى شەستەکان و تەواوبوونی شەڕی ئێران و عێراق گووتی "ئێستا ئێران لەگەڵ قەیرانی جددیتر ڕووبەڕوویە و بەردەوامی ئەو دۆخە گوشارێکی زۆری بۆ سەر خەڵکی هەژاری ئێران درووست کردووە".
سەرهەڵدانەکانی بەفرانبار هیچ پەیوەندییەکى بە هەژارییەوە نەبوو!
موحسێن هاشمی کە کوڕی هاشمی ڕەفسەنجانییە باسی گەندەڵی و خواردنی ماڵ و موڵکی هاووڵاتیان لە لایەن بەرپرسانەوە دەکات و دەڵێ ئابلۆقەکانی ئەمریکا، ئیسرائیل و دەوڵەتە عەڕەبییەکان هۆکاری تەشەنەکردنی ناڕەزایەتییەکانن. ئەو کوڕەی ڕەفسەنجانی بە وەبیرهێنانەوەی ڕووداوەکانی ساڵی ٨٨ و دەرکەوتەکانی دەڵێ "ئەو پرسە هەروا بە چارەسەرنەکراوی ماوەتەوە".
ناوبراو باسیش لەوە کردووە کە نەبوونی ئاو و قەیرانی خۆڵبارین لەسەر هەموو کێشەکانی دیکە ڕێگەخۆشکەرە بۆ ئەوەی هاوشێوەی ڕووداوەکانی مانگی بەفرانبار خەڵک بێتەوە سەر شەقام.
لە مانگی بەفرانباری ڕابردوودا بە هۆی گرانبوونی شتومەک و دۆشدامانى خەڵکى لە دابینکردنی پێداویستییە سەرەتاییەکانی ژیانیان، زنجیرە چالاکییەکی ناڕەزایەتی پتر لە ١٠٠ شاری ئێرانی گرتەوە کە تێیدا چەندین کەس کووژران و بە سەدان کەس دەستبەسەر و لە نێو گرتوخانەکاندا ناچار بە خۆکووشتن کران.
