بە قسەى حسێن ئەحمەدى نیاز، پارێزەى چەند کەس لە قوربانیانى مین و یەکێک لە واژووکەرانى نامەکە بۆ سەرۆککۆمار، لە پاش شەڕى ئێران و عێراق نزیکەى ٢٠ ملیۆن مین لە ناوچە و گوند و شارە سنوورییەکان دانراونەتەوە کە سەدا حەفتایان واتە زیاتر لە ١٤ ملیۆنیان کەوتوونەتە پارێزگاکانى ڕۆژهەڵاتى کوردستانەوە. ڕەزبەرى ساڵى ١٣٩٢ مینە پووچەڵنەکراوەکانى نێو حەسارى قوتابخانەیەک لە نشکانش، لە یەکێک لە گوندەکانى شارى مەریوان، حەوت منداڵ بریندار بوو و یەکێکیان پێى لەدەست دا.
پێویست بە وەبیرهێنانەوەیە کە لە سالآ ١٣٨٣ کانوونى "هاوبەشى لە پاککردنەوەى مین" کە ناوەندێکى سەربەخۆ بوون و لە لایەن شیرین عیبادی و چەند کەسێکى دیکەوە دانرابوو، پێنج ساڵ دواتر لە لایەن ئیتلاعاتەوە دەرگاکەى کڵۆم درا. ئێستا تەنیا دامەزراوەیەک کە نادەوڵەتییە و کار بۆ پاککردنەوەى مین دەکات، دامەزراوەى "ئێرانی بێ مین"ـە.
شایەنى باسە ئێران هیچ هاوپەیمانى و بەڵێننامەیەکى لەم بارەوە لەگەڵ کۆمەڵگەى نێودەوڵەتى نییە وەک ئەو وڵاتانەى کە چوونەتە نێو ئەم پەیمانەوە و واژووى ئەوەیان کردووە کە تا ١٥ ساڵ ئەبێت وڵاتەکەیان پاک بکەنەوە، بەڵام بەرپرسانى ئێران دەڵێن "ئێمە خۆمان وڵاتەکەى خۆمان لە مین پاک دەکەینەوە" و ئامادجە نین "سنوورەکانیان بخەنە مەترسی دەستتێوەردانى دەرکی"ـیەوە.
