دژەتیرۆری کوردستان ئاماری فەرمیی هێرشەکەی ئەمشەوی سەر هەولێر بڵاو دەکاتەوە و ڕایدەگەیەنێت، سەرجەم درۆنەکان پێش پێکانی ئامانجەکانیان لە لایەن هاوپەیمانانەوە خراونەتە خوارەوە.
بەگوێرەی زانیارییە فەرمییەکانی بەڕێوەبەرایەتیی گشتیی دژەتیرۆری کوردستان، ئەمشەو چوارشەممە 15-7-2026، لە کاتژمێر 8:53 تاوەکو کاتژمێر 9:20، ئاسمانی شاری هەولێر ڕووبەڕووی هێرشێکی چڕی درۆنی بووەوە.
دژەتیرۆری کوردستان ئاشکرای کرد، هێزەکانی هاوپەیمانی نێودەوڵەتی لەو ماوە کورتەدا توانیویانە هەشت درۆنی بۆمبڕێژکراو لە ئاسمانی هەولێر تێکبشکێنن و بخەنە خوارەوە، خۆشبەختانە هێرشەکان هیچ زیانێکی گیانییان لێ نەکەوتووەتەوە.
پێشتر میدیا فەرمییەکانی کۆماری ئیسلامیی ئێران ڕایانگەیاندبوو کە هێرشەکان لە لایەن سوپای پاسدارانەوە ئەنجام دراون، بەڵام داتاکانی دژەتیرۆر دەریانخست کە سیستمی بەرگریی هاوپەیمانان تەواوی هێرشەکەی پووچەڵ کردووەتەوە.
