بە پێى ڕاپۆرتى ڕێکخراوى لێبوردنى نێودەوڵەتى، زیندانى کورد کەماڵ کەریمى کە تەمەنى ٤٩ ساڵە و نەخۆشە، لە ساڵى ١٣٨٧ى هەتاوییەوە تا ئێستا بە شێوەى نادادپەروەرانە زیندانە و بە دەستى ئەنقەست بێبەش کراوە لە خزمەتگوزارییە پزیشکییەکان و چاوپێکەوتن لەگەڵ بنەماڵەکەى.
ئەم ڕێکخراوەیە بانگەوازێکى بە پەلەى بڵاو کردووەتەوە بۆ ڕزگارکردنى گیانى کەمال شەریفى و داواى لە خەڵک بە گشتى کردووە کە بە زمان و قەڵەمى خۆیان سوود لەم دەقە پێشنیارکراوەى لێبوردنى نێودەوڵەتى وەربگرن و ڕووبەڕووى بەرپرسانى دادوەرى کۆمارى ئیسلامى ببنەوە و داوایان لێ بکەن کە ئەم زیندانییە سیاسییە ئازاد بکەن و تا کاتى ئازادکردنى، پێویستە بە خێرایی پزیشک لە دەرەوەى بەندیخانە بیپشکنێت و هەروەها بنەماڵەکەى بیبینێت.
بە پێى ڕاپۆرتەکە، کەماڵ شەریفى لە ساڵى ١٣٩٠ى هەتاوى سەکتەى دڵى کردووە و کێشەگەلى نەخۆشى دڵ و هەرس و ئازارى جومگەکان و سوانى پووک و لەدەستدانى ددانەکانى هەیە. شەریفى، لە ١٢ى ڕەشەممەى ١٣٩٩ى هەتاوى لە زیندانى مینابی پارێزگاى هورمزگان تووشى سەکتەى دڵ بووەوە و گوازرایەوە نەخۆشخانە، کەچى تەنیا دواى چوار ڕۆژ و بە پێچەوانەى ڕێنماییەکانى پزیشک گەڕێنرایەوە بەندیخانە.
ڕێکخراوى لێبوردنى نێودەوڵەتى لەبارەى شێوەى ڕەفتارى بەرپرسانى زیندان لەگەڵ ئەم زیندانییە سیاسییە، باسى لەوە کردووە: "کەماڵ لە ڕێکەوتى ٢٠ى ڕەشەممەى ١٣٩٩ى هەتاوى لە برایە نەخۆشخانەیەک لە بەندەرعەباس و نەشتەرگەرى کرا و بێ سەرنجى پزیشکى و دواى دوو ڕۆژ برایەوە بەندیخانە، لەگەڵ ئەوەشدا بە قسەى شەریفى، پزیشکەکەى پێى گوتبوو کە دەبێت بۆ ماوەى دوو ساڵ و هەر مانگەى جارێک پشکنینى بۆ بکرێت، کەچى تا ئێستا پزیشک نەیبینیوە".
بە پێى ڕاپۆرتەکە، کەمال شەریقى زۆر نیگەرانە لەوەى کە بەرپرسانى زیندان بە بێبەشکردنى لە دەرمان و پشکنینى پزیشکى دووبارە تووشى هێرشى دڵ و سەکتە ببێتەوە، چونکە لە ژوورێکیان داناوە کە پڕە لە زیندانى مەحکومکراو بە تۆمەت و تاوانى گەورە و هەروەها بە هۆى خۆراکى خراپەوە گیانى لە مەترسیدایە. ئەم دۆخەش هۆکارە بۆ پێشێلکارى لە ڕێنماییە پزیشکییەکانى کەماڵ شەریفى کە پێى ڕاگەیێنرتوە دەبێت سترێس و قەڵەق نەبێت و خواردنەکەى تەندروست بێت.
ڕێکخراوى لێبوردنى نێودەوڵەتى ڕایگەیاندووە کە بەرپرسانى دادوەرى شەریفییان مەحکوم کردووە کە لە کاتى تێپەڕاندنى زیندانییەکەى، "بێبەش بێت لە چاوپێکەوتن و قسەکردن لەگەڵ کەسانى دیکە"، ئەم دۆخەش جۆرێکە لە ئەشکەندە و ئازارى بێبەزەییانە و نائینسانانە، بۆیە دەشبینین کە نزیکەى ١٤ ساڵە شەریفى تەنیا یەک جار بنەماڵەکەى بینیوە.
ئەم ڕێکخراوەیە نووسیویشیەتى کە کەماڵ شەریفى دەڵێت لە وەڵامى سکاڵا بەردەوامەکانى بەرامبەر خراپەڕەفتارى و بێبەشکردنى لە چاودێرییە پزیشکییەکان، بەرپرسانى زیندان پێیان گوتووە ناوەندە ئیتلاعاتییەکان سوورن لەسەر یاساغکردنى هەر جۆرە چاوپێکەوتنێک لەگەڵ بنەماڵەکەى و بەرپرسانى دادوەریش هیچ بڕیارێکیان لەسەر گواستنەوەى بۆ ناوەندێکى پزیشکى لە دەرەوەى زیندان نەداوە.
هەر بە پێى ڕاپۆرتەکە، ئەم زیندانییە سیاسییە لە مانگى سەرماوەزى ١٣٧٨ى هەتاوى و پاش دادگاییەکى نادادپەروەرانە کە نزیکەى ٥ خوولەکى خایاندووە و لەسەر بنەماى "ددانپیانان"ـى دەستکەوتوو بە هۆى ئەشکەنجە و ئازارەوە، بە تۆمەتى "دژایەتى" بە ٣٠ ساڵ زیندانى مەحکوم کراوە.
ڕێکخراوى لێبوردنى نێودەوڵەتى ڕوو لە خەڵکى ئێران دەکات و دەڵێت بە نامەناردن داوا لە بەرپرسانى کۆمارى ئیسلامى بکەن کە کەماڵ شەریفى بە خێرایی ئازاد بکەن، چونکە بە بوونى نەخۆشیگەلى جدددى وەک کۆڤید ـ ١٩ لە زیندان، زیاتر دەکەوێتە بەردەم مەترسى مەرگ یا نەخۆشیی کوشندە.
ڕێکخراوى لێبوردنى نێودەوڵەتى لەو کۆتاییدا پێداگرى لەسەر ئەوە کردووەتەوە کە بەرپرسانى کۆمارى ئیسلامى دەبێت بەدواداپوون بکات بە نیگەرانییەکانى تایبەت بە چاودێرییە پزیشکییەکان و قەرەباڵغى زۆر لە زیندان و نەبوونى تەندرووستى و خۆراکى باش لە زیندانى میناب تا بە پێى ستاندارە نێونەتەوەییەکان بێت و ڕێگە بدات بە پشکنەران و ناوەندە سەربەخۆ نێونەتەوەییەکان بۆ سەردانیکردنى زیندانەکان.
