مەعسومە ئیبتیکار جێگری سەرکۆماری ئیران: ئەگەر تەمەنی ١٣ ساڵ بۆ بە شوودانی کچان باشە دەبێ لە لەو تەمەنەدا کچان بتوانن دەنگ بدەن و ئیزنی سەیارە لێخوڕینیش وەربگرن.
پەڕلەمانی ئێران کە بەشێکە لە قەوارەی سیاسی ئیسلامی کۆماری ئیسلامی و یاساکانی لەسەر بنەمای شەریعەت دادەڕێژێ گەڵاڵەی یاساغ کردنی بە شوودانی کچانی تەمەن ١٣ ساڵی ڕەت کردەوە و ئەو کارەی پەڕڵەمان بووە هۆی ناڕەزایەتی چالاکانی مافی ژنان و کۆمەڵگەی مەدەنی ئێران.
مەعسومە ئیبتیکار ڕۆژی دووشەممە لە کاتی چوون بۆ پارێزگای ئەلبورزدا گووتی پێشگرتن لە بە شوو دانی کچانی تەمەن ١٣ ساڵ ویستێکی گشتییە. لە درێژەی قسەکانیدا ئیبتیکار گووتی: بە پێی ئەو ئامارانەی هەیە ڕێژەی جیا بوونەوە و خەسارەکانی دیکە لە پڕۆسەی پێکهێنانی ژیانی هاوبەشی منداڵاندا زیاتر دەبێت و پێویستە پەڕلەمان جارێکی دیکە پێداچوونەوە بەو یاسایەدا بکات.
جێگری سەرکۆماری ئێران تایبەت بۆ کارو باری ژنان و بنەماڵە وێرای ڕەخنە گرتن لە نەبوونی هاوئاهەنگی لە نێوان یاساکانی ئێراندا رایگەیاند: ئەگەر تەمەنی ١٣ سالان بۆ پێکهێنانی ژیانی هاوبەش باشە دەبێ هەموو یاساکانی دیکەش بگۆڕدرێن بۆ ئەوەی کچان بتوانن لە ١٣ ساڵیدا دەنگ بدەن، گەواهینامە وەرگرن و داوای تەڵاق بکەن.
گەڵاڵەی یاساغ کردنی بە شوودانی منداڵان لە ئەنجومەنی قەزایی و حقوقی پەڕلەماندا بە هۆی دژایەتی مەرجەعەکانی کۆماری ئیسلامی ڕەت کرایەوە.
