یەکەم ڕۆژ، لەسەر جادەى مەیدانى تەحریر کە نزیکە لە هۆتێل بەغداوە، لە دوورى ٣٠ بۆ ٤٠ مەتر، ئۆتۆمبێل بەرزى جامڕەش بینراوە کە خەڵکى ڕیشداری تێدا بووە و و پۆل پۆل گەنجیان ماچ کردوون و ناردوویاننەتە نێو خۆپێشاندانەکانەوە، وەک لە زمانى شایەتحاڵێکیشەوە بیستراوە، "ئەم پیلانە بۆ ئەوە بووە کە خۆپێشاندانەکە بەلاڕێدا ببرێت و ئەم کەسانەیش سەر بە کۆمارى ئیسلامى و حەشدى شەعبی بوونە".
خۆپێشاندەران هەوڵیان داوە بچنە نێو فڕۆکەخانەوە، هەر ئەمەیش هۆکار بووە بۆ ئەوەى کە قەدەغەى هاتوچۆ بکرێت و وەک یەکێک لە موسافیرەکانى فڕۆکەخانەکە بە پەیامنێرەکەى ئاڤاتودەى گوتووە "هەرچەندە خۆپێشاندەران دەڵێن ئێمە کارمان بە فەرمانگە ئیدارییەکانى دەوڵەتەوە نییە، بەڵام فڕۆکەخانەکە تەواو پارێزراو بوو. تەنانەت ئێمە کە پۆلێک بووین و بۆ سیمینارێک لەبارەى توندوتیژى ژنانەوە چووبووینە بەغدا، لە ئۆتێلەکەمانەوە تا فڕۆکەخانە ئۆتۆمبێلمان دەستنەدەکەوت و کەس نەیدەوێرا بێتە دەرەوە، بە هەر جۆرێک بوو پاش ٦ شوێن پشکنین و نیشاندانى بلیت و پاسپۆرتەکانمان گەیشتینە فڕۆکەخانە".
ئەم هاووڵاتییە باسى لەوە کردووە کە ئەو دوو ڕۆژە نەیانوێراوە لە هۆتێلەکەیان بێنە دەرەوە و تەنانەت ئەو ئۆتۆمبێلە سەربازییانەى کە بۆ پاراستنى هۆتێلەکەیان تەرخان کراوە، دانەیەکیان سووتێنراوە!
درووشمى سەرەکى خۆپێشاندەرە عێراقییەکان " بەغدا حرە حرە/ایران برە برە" بووە کە ئەمەش نیشانەى بێزاربوونى خەڵکى عێراقە لە دەستتێوەردانەکانى کۆمارى ئیسلامى لەو وڵاتە لە ڕێگەى حەشدى شەعبی و بریکارەکانى دیکەى ڕژێم و خودى سوپاى قودسیش. بەڵام لەگەڵ ئەوەشدا درووشمى دیکەى تایبەت بە خزمەتگوزارى و ئاوەدانى و خزمەتکردنى خەڵک و گەڕاندنەوەى سەروەرى بۆ ئەم وڵاتە دەگوترایەوە.
یەکێک لە ڕابەران و فەرماندەکانى خۆپێشاندەرەکان بە پەیامنێرەکەى ئاڤاتودەى گوت کە "لەیەکەم ڕۆژى خۆپێشاندانەکەماندا سەرەتا تەنیا هێزە ئەمنییەکانى پۆلیس و فریاکەوتن بەرامبەرمان وەستانەوە، تا ئەوە بوو کە ئەرتەشیان هێنا بەڵام بەوە کە ئەرتەش هاتە بەرەى خۆپێشاندەرەکانەوە چەندین هێزیان هێنا بۆ سەرکوتى خۆپێشاندەران کە حەشدى شەعبی و سوپاى قودس لە دیارترینیان بوون"، ئەم ڕابەر و فەرماندەیەى خۆپێشاندەران باسى لەوە کرد کە قەناس بەدەستەکانى حەشدى شەعبی و سوپاى قودس لەسەر باڵەخانەکانەوە ڕاستەوخۆ تەقەیان لە خۆپێشاندەران کرد و هەر ئەمەیش هۆکار بوو بۆ کوشتنى چەندین کەسى چالاکى نێو خۆپێشاندەران".
شایەتحاڵێکى دیکەیش باس لەوە دەکات کە "دوو قسەى دژ بەیەک هەیە لە عێراق سەبارەت بە هۆکارى سەرهەڵدانى ناڕەزایەتى و خۆپێشاندانەکان، بەشێک لە بەرپرسانى حکومەت کە لە خەڵکى نزیکن، ئەم ناڕەزایەتى و خرۆشانە دەدەنە پاڵ ئەمریکاوە و پێیان وایە ئەمریکا دەیهەوێت پشێوى و ئاڵۆزى بنێتەوە، بەڵام ئەوەى کە ئێمە خۆپێشاندەران دەیزانین دوو شتە: نەبوونى خزمەتگوزارى لە لایەن بەرپرسانى گەندەڵى دەوڵەتەوە و هەروەها دەرکردن و چوونەدەرەوەى سوپاى قودس و ئێرانییەکان لە نێو عێراق".
هێمن باجەلان ئەندامی کۆمسیۆنى باڵاى مافى مرۆڤ کە لە عێراق ١٤ نووسینگەى هەیە، تایبەت بە تۆڕى میدیایی ئاڤاتودەى باسى لەوە کرد "تا ئێستا ١٠٤١ کەس بریندار و ١٩ کەس کوژراون و زۆرێک لە بریندارەکانیش برینەکەیان سەختە".
ئەمڕۆ کە سێیەم ڕۆژى خۆپێشاندانە سەرتاسەرییەکەى عێراق بوو، بە قسەى شایەتحاڵەکان لە شەوەوە هاتوچۆ بۆ هەموو کەسێک و بە هەموو شێوەیەک قەدەغە کراوە و خەڵک ناوێران بێنە دەرەوە و سەرلەبەیانییەکەش تەقەیەکى زۆر بیستراوە و لە دەیان شوێنى بەغدا ئاگر بینراوە و دووکەڵ ئاسمانى ئەو پایتەختەى تەنیوە!
