دەنگى ئەمریکا بڵاوى کردەوە کە دوێنێ سێشەممە دادوەرى ئامریکا لە نیۆیۆرک قاچا‌خچییەکی ماددەى هۆشبەرى هێرۆیینى دادگایی کرد کە بەکرێگیراوێکى کۆمارى ئیسلامییەوە بە ناوى مالک محەممەد بەلوچ زەهی کە بە "مالیک خان" بەنێوبانگە.
مالک محەممەد بەلوچ زەهی تەمەنى ٣٨ ساڵە و یەکێکە لە مۆرەکانى کۆمارى ئیسلامى و چەندین ساڵە کار لەسەر بازرگانى ماددەى هۆشبەر دەکات و لە ئێرانیش یەکێکە لەو کەسانەى کە زۆرترین ماددە بڵاو دەکاتەوە.
لە لایەن وڵاتى کینیاوە دەستبەسەر کراوە و لە ٩ى ئۆکتۆبەرى ٢٠٢١ نێردراوە بۆ ئەمریکا و دوێنێ سێشەممە ١٢ى ئۆکتۆبەر لە لایەن دادوەر سارا نێترن ـەوە دادگایی کرا. هۆکارى دەستبەسەرکردنەکەشى کارکردن بووە لە ناردنى ماددەى هۆشبەر لە وڵاتى کینیاوە بۆ ئەمریکا و بڵاوکردنەوەى لەو وڵاتە. هەروەها دادوەرەکەى ئەمریکا باسى لەوە کردووە کە ئەم پیاوە ٤٠٠ کیلۆ هێرۆیینی بۆ ئامریکا و مێتامفتامینی بۆ ئوسترالیا بە قاچاخ هەناردە کردووە.
لە بەیاننامەى دادوەرى ئەمریکادا هاتووە: بەلوچ زەهى قاچاخچییەکى ماددەى هۆشبەر و نیشتەجێى ئێرانە کە خەریکى بڵاوکردنەوەى مێتامفتامین و بەرهەمهێنان و بڵاوکردنەوەى هێرۆیینە و لە ئەگەرى تۆمەتباربوون بەلانى کەمەوە بە ١٠ ساڵ زیندانى یا زیندانیی هەتاهەتایی سزا دەدرێت، بەڵام تا کاتى تۆمەتبارنەبوون و نەسەلماندنى تاوانباربوونى، بە بێتاوان هەژمار دەکرێت.
