ڕۆژی شەممە ٢٠ی سەرماوەزی ساڵی ١٤٠٠ی هەتاوی، "ئامانج ئەمینی" چالاکی سێنفیی مامۆستایان بۆ ستادی خەبەریی ئیدارەی ئیتلاعاتی سەقز بانگهێشت و لێپرسینەوەی لەگەڵ کرا.
بە وتەی سەرچاوەیەکی ئاگادار، ئەو چالاکە سێنفییە لە ستادی خەبەریی ئیدارەی ئیلاعاتی سەقز لەلایەن هێزە ئیتلاعاتییەکانەوە بێڕیزیی پێ کراوە و لێی دراوە.
ئەنجومەنی سێنفیی مامۆستایانی کوردستان (سەقز و زیویە) بە بڵاوکردنەوەی بەیانییەیەک وێڕای مەحکوومکردنی ئەم هەڵسوکەوتەی ستادی خەبەریی ئیدارەی ئیتلاعاتی سەقز ڕایگەیاند:
ئامانج ئەمینی بە دوای پەیوەندییەکی تەلەفۆنی و بانگهێشتی ستادی خەبەری و بە پێی سیاسەت و پەیوەندییەکی دوو لایەنە کە ئەنجومەنی سێنفیی مامۆستایانی سەقز و زیوە پێی پێبەند بوونە، بۆ وتووێژکردن سەردانی ئەم ناوەندەی کردووە کە هەر لە سەرەتاوە بە هەڵسوکەوتێکی نەشیاو لێپرسینەوەی لەگەڵ کراوە و لەنێوان وتووێژەکانیان ناوبراویان داوەتە بەر ئەشکەنجە و لێدان و بێڕێزییان پێ کردووە.
هەروەها ئەو ئەنجومەنە خوازیاری ئەوە بووە کە لەو مامۆستا تێکۆشەرە داوای لێبووردن بکرێت. بانگهێشتی "ئامانج ئەمینی" پاش مانگرتنی سەرتاسەریی مامۆستایان لە ئێران و کوردستان ڕووی داوە.
