کۆمارى ئیسلامى بۆ چەندەمین جار پرسى حیزبە ڕۆژهەڵاتییەکانى هەرێمى کوردستان دەهێنێتەوە گۆڕێ و لە کاتى قسەکردنى محەمەد خەتیب زادە، وتەبێژی وەزارەتی دەرەوەی کۆمارى ئیسلامى لە کۆنگرەیەکى ڕۆژنامەنووسى لەسەر هەڵبژاردنەکانى عێراق، داواى نەهێشتنى هێزەکانى ڕۆژهەڵات لە نێو عێراق و هەرێمى کوردستانى کرد.
ڕۆژى یەکشەممە ١٨ى ڕەزبەر (١٠ى ئۆکتەبەرى ٢٠٢١)، هەڵبژاردنی پێشوەختە بۆ پەرلەمانى عێراق بەڕێوە چوو و لەم بارەوە کۆمارى ئیسلامى قسەى فەرمى خۆى ڕاگەیاند و لەو نێوەندەشدا وەک هەمیشە و بۆ چەندەمین جار هاتەوە سەر پرسى حیزبە ڕۆژهەڵاتییەکان لە نێو خاکى هەرێمى کوردستان و عێراق.
محەمەد خەتیب زادە، وتەبێژی وەزارەتی دەرەوەی کۆمارى ئیسلامى لە کۆنگرەیەکى ڕۆژنامەنووسى گوتى: "هەڵبژاردنى ڕۆژی یەکشەممە لە عێراق، درێژەپێدەری پرۆسەی دیموکراسییە لەو وڵاتە. ئێمە پێشوازی لە ئەنجامدانی هەڵبژاردن دەکەین لە عێراق کە بە سەرکەوتووییەوە ئەنجام دران" و هەروەها باسى لەوە کرد کە عێراق ئێستا لەسەر ڕێڕەوێکی ڕاستە و بەرەو دیموکراسی دەچێت، وەک ئەوەى کە کۆمارى ئیسلامى خۆى دیموکراسییەکى بێ وێنەى لە دونیا بنیات نابێت و خوازیارى بەدیموکراسیکردنى وڵاتانى دیکە بێت.
محەمەد خەتیب زادە، وتەبێژی وەزارەتی دەرەوەی کۆمارى ئیسلامى لە کۆنگرەیەکى ڕۆژنامەنووسییەکەدا دووبارە وەک چەندین فەرماندەى باڵاى سوپاى تیرۆریستى پاسداران باسى حیزبە کوردییەکانى کردەوە و گوتى: بوونی هێزە چەکدارە کوردییەکانی دژی کۆماری ئیسلامی لە هەرێمی کوردستان و عێراق ڕەت دەکەینەوە و پێداگرى لەسەر نەهێشتنى بنکە و بارەگاکانیان لەو ناوچانە دەکەینەوە.
وتەبێژەکەی وەزارەتی دەرەوەی کۆمارى ئیسلامى ئەوەى نەشاردەوە کە هەر خۆى چەندین جار داوای لە عێراقییەکان و هەرێمی کوردستان کردووە کە بوونی بنکە و بارەگاکانى حیزبە کوردییەکانى ڕۆژهەڵاتى کوردستان، "پەیوەندی بە دراوسێیەتی باشەوە نییە و داوای لابردن و دوورخستنەوەیان دەکەین".
