ئەمریکا دەستی بە کۆمەڵێک زانیاری ڕاگەیشتووە کە نیشان دەدات ڕژیمی ئێران بەشێک لە سیستەمی بەرگری ئاسمانی خۆی لە بەرزترین ئاستی ئامادە باش داناوە و بەرپرسێکی ئەمریکایی بە سی ئێن ئێنی گووت: ئەو کارەی ئێران دوای تەقینەوە یەک لەدوای یەکەکانی ئەو وڵاتە لە ڕۆژانی ڕابردوودا دێت کە دامەزراوە ئەتۆمی و مووشەکیەکانی ئەو وڵاتەی بەئامانج گرت.
ئەو بەرپرسە ئەمریکاییە بە سی ئێن ئێنی گووت: حاڵەتی ئامادە باش یانی ئەوەیکە ئێران مووشەکە زەوی بۆ ئاسمانەکانی ئامادەکردووە بۆ ئەوەی لە ئامانجە گوماناویانەکان بدات.
ئێستا ڕوون نییە ئەمریکا چۆن دەستی بەو زانیاریانە ڕاگەیشتووە بەڵام ماهوارە، فرۆکەی سیخوڕی و کەشتیە ئەمریکاییەکان بە بەردەوامی ئێران و جموجۆلەکانی ئەو وڵاتەیان لەژێر چاودێری دایە.
ئەمریکا لەو باوەڕە دایە ئامادەباشی هێزەکانی ئێران مانۆڕ و نمایشی سەربازی نییە و وڵامدانەوەیە بەو ڕووداوانەی لە ڕۆژانی ڕابردوودا ڕوویاندا و دەریدەخات ئێران لە دیاریکردنی ئەوەیکە هەڕەشەکانی سەری چین تووشی سەرلێشێوان بووە.
بۆچوون و شرۆڤە جیا و لێکدژەکان سەبارەت بە ڕووداوەکانی چەند ڕۆژی ڕابردووی ئێران هەیە و بۆچوونێک باس لەوە دەکات ئیسرائیل دەستی لەو هێرشانەدا هەیە و هێندێک لە بەرپرسانی ئیسرائیلی ناڕاستەوخۆ ئەوەیان پشت ڕاست کردووەتەوە.
دامەزراوە ئەتۆمی و مووشەکە بالستیکەکانی ڕژیمی ئیران لە ماوەی یەک مانگی ڕابردوودا چەندین جار بوون بە ئامانجی هێرش. بەگشتی چەندین تەقینەوە لە مانگی ڕابردوودا ئێرانی وەلەرزە خست و بنکەی ئەتۆمی و مووشەکی زۆر بەئامانج گیران و لەو نێوەدا دامەزراوەی پیتاندنی یۆرانیۆمی نەتەنز گرینگیترین ناوەند بوو کە بوو بە ئامانجی هێرشەکان.
