ڕۆژی 20ی ڕەشەمە لە کۆڕێکدا کە بە بەشداریی کۆمەڵێک لە مامۆستایان و خوێندکارانی زانکۆی کوردستانى شارى سنەى ڕۆژهەڵاتى کوردستان بەڕێوە چوو، خوێندنەوە بۆ کتێبی وشەناسیی زمانی کوردی کە لە لایەن سەعید کەرەمی نووسراوە، کرا. ئەم کتێبەى کەرەمی کە لە لایەن توێژینگەی کوردستان‌ناسییەوە لە چاپ دراوە و ئەرکی هەڵسەنگاندنی کتێبەکەش لە سەر شانی بەشی زمان و ئەدەبی کوردیی کۆلێجی زمان و ئەدەبیات بوو.
سەرەتادا دکتۆر ئومید قادرزادە وەک بەڕێوەبەری توێژینگەی کوردستان‌ناسیی زانکۆى کوردستان لە سەر کار و چالاکییەکان و هەروەها بەرنامەکانی دیکەی توێژینگە بۆ ساڵی داهاتوو دوا. پاشان پەنێلێکی زانستی لە لایەن مامۆستایان، دکتۆر یادگار کەریمی، دکتۆر ڕەحمان وەیسی و دکتۆر زانیار نەقشبەندی بەڕێوە چوو؛ لەم پەنێلەدا جەخت کرایە سەر تایبەتمەندی و لایەنە جیاجیاکانی کتێبەکە و پاشان هەندێک پێشنیار و ڕەخنە ئاراستەی بەرهەمەکەی کاک سەعید کەرەمی کرا.
لە دوا بەشی کۆڕەکەدا چەند پرسیارێک ئاراستەی مامۆستایان و دانەری کتێبەکە کرا.
