ناوەندی دەنگ و ڕەنگی شارەکانی کۆمارى ئیسلامى، بۆ دژایەتیکردنى میدیاى ئازادى کوردى، کەڵک لە سیما ناسراوەکانی دونیای ئەدەب و هونەری کوردی وەردەگرێت.
دەنگ و ڕەنگی شاری مەهاباد چەندین بەرنامەی تایبەت بە شیعر و ئەدەبیاتی کوردی بەڕێوە دەبات و پێشکەشکاری ئەو بەرنامانەش ئەو کەسانەن کە لە نێو خەڵکدا خۆشەویستن و خاوەن ئەزموون لە کارەکانی خۆیاندا. خوێندنەوەی شیعر بە دەنگی کەسانی دەنگخۆش و باسکردن لەسەر مێژوو و ئاسەوارە مێژوییەکان و هەروەها بڕگەی تایبەت بە کەلەپوور و فەرهەنگی کوردی لە شار و دێ بەشێکن لەو بەرنامانەی لەو چوارچێوەدا بەرهەم دەهێندرێن.
دەنگ و ڕەنگی مەهاباد ماوە ماوە پرسیار نامە لە نێو خەڵکدا بڵاو دەکاتەوە و زانیاری لەسەر ئەوە کۆ دەکاتەوە کامە تەلەفزیۆنە کوردییە زۆرتر چاو لێ دەکەن و لەو نێوەشدا کامە بەرنامەیان زۆرتر؟ لە بەشێکی دیکەی پرسیارەکاندا باسی ئەوە دەپرسن ئەو بەرنامانەی ئێوە بە دڵتانن چ کاتژمێرێک و بە شەو یان بە ڕۆژ بڵاو دەبنەوە؟
سەرچاوەیەک لە دەنگ و ڕەنگی مەهابادەوە بە تۆڕى میدیایی ئاڤاتودەی ڕاگەیاند "پاش ئەوەی پرسیارنامەکان پڕكرانەوە دەچنەوە بەردەستی کاربەدەستە سەرەکییەکانی تەلەفزیۆنەکە و لە ڕێگەی ڕاوێژکارە تایبەتییەکانی خۆیانەوە کە سەر بە دەزگای ئیتلاعاتن لە پلانی کاری تەلەفزیۆنەکە دەگونجێندرێن".
سەرچاوەکە ئەوەشی ئاشکرا کرد بەشێکی کاری دەنگ و ڕەنگی شارەکان ئێستا جێگرەوە سازییە، بەو واتایەی کە نمونەی ئەو بەرنامانەی خەڵک پێیان خۆشن و لە تەلەفزیۆنە کوردییەکانی حیزبەکان و بەشەکانی دیکەی کوردستان بڵاو دەبنەوە لە دەنگوڕەنگی شارەکان دروست دەکرێنەوە.
ئامانج لەو کارەش بێ بەردەنگکردنی تەلەفزیۆنە کوردییەکانە کە کۆماری ئیسلامی بە مەترسی بۆسەر خۆیان دەزانێت و لەو نێوەدا چالاکانی فەرهەنگی کوردی ڕاستەوخۆ و ناڕاستەوخۆ لە لایەن مێدیای کۆماری ئیسلامی و بە پلانی وەزارەتی ئیتلاعات بەکار دەهێندرێن.
