هەواڵدەرى ئەسۆشیتدپرێس بڵاوى کردەوە کە پیاوێکى ٤٦ ساڵەى عێراقى ئەمڕۆکە لە سوید دادگایی کردووە کە تۆمەتبار بوو بە سیخووڕى بۆ کۆمارى ئیسلامى و لە دادگاییەکەیشدا تاوانبار بووە!
بە پێى قسەى دادوەر "هانس جۆرجێن هانسترۆم ـ Hans-Jorgen Hanstrom"، ئەم پیاوە ٤٦ ساڵە عێراقییە کە ناوەکەى ئاشکرا نەکراوە، لە ژێر نوێنەرایەتى ڕۆژنامەیەکى ئۆنلاینى عەرەبی، هەوڵى داوە زانیارى لەسەر ئێرانییە نیشتەجێکانى سوید و بەتایبەت گرووپى ئەحوازییون بۆ کۆمارى ئیسلامى کۆ بکاتەوە.
بە قسەى دادوەرەکە، ئەم پیاوە لە خۆپێشاندانى ئۆپۆزسیۆنى ئێرانى لە بلژیک و هۆڵەند و سوید و کۆنفڕانسە گەورەکەى ئەحوازییون فیلمى هەڵگرتووەتەوە.
ئەم پیاوە لە ٢٦ى ڕێبەندان دەستبەسەر کراوە و بە پێى ڕاپۆرتى ئەسۆشیتدپرێس، فایلەکەى ١٧٠٠ لاپەڕەیە کە لەخۆگرى پەیوەندییەکانیەتى لەگەڵ ئێران و هەموو ئەو زانیارییانەى کە لە خەڵک وەری گرتووە!
هاوکات دوو سیخووڕى دیکەى کۆمارى ئیسلامیش لە ئەمریکا بە تاوانبار ناسران!
