تەنیا لە مانگی گەلاوێژدا ٣٦ شارۆمەندی کورد لە شارەکانی شنۆ، پاوە، سنە، کرماشان، سەردەشت، داڵاهۆ، کامیاران، ئیلام، سەقز، بۆکان، پیرانشار، ڕوانسەر، ورمێ و مەریوان دەستبەسەر کراون.
ناوەندی دیموکڕاسیخوازی و مافی مرۆڤی کوردستان بە بڵاوکردنەوەی ئاماری مانگی گەلاوێژ ڕایگەیاند "٣٦ کەس لە کوردستان دەستبەسەر کراون کە ٦ کەسیان چالاکی کرێکاری بوون و ئەوانی دیکە بە تاوانی پێوەندی لەگەڵ حیزبەکانی کوردستان خراونەتە زیندانەوە". لەو مانگەدا دوو کەس بە لێدانى ٧٤ قامچی سزا دراون کە یەکێکیان ڕۆژنامەنووسە و ئەویتریشیان چالاکى مەدەنییە لە شارى سەقز.
خوێندکارێک لە سنە بە ٨ ساڵ زیندانی و گیراوێکی بەهاییش بە یەک ساڵ زیندانی و دوورخستنەوە لە شوێنی ژیانی مەحکوم کراون و لە لایەکی ترەوە دوو کەس لە نەغەدە و پیرانشار وەک یەک بە پێنج ساڵ زیندانی و ٦ مانگ دوورخستنەوە لە شوێنی ژیانی سزا دراون. بەندکراوێک لە ورمێ بە هۆی پێڕانەگەیشتن گیانی لەدەست داوە و چوار بەندکراوی دۆسیەی ماددەی هۆشبەر و کوشتنی بە ئەنقەستیش لە سێدارە دراون.
هەر لە مانگی گەلاوێژدا لانیکەم ١٠ کۆڵبەر لە ناوچە سنوورییەکان کوژران و ٨ کەس بریندار بوون کە لەو ژمارەیە تەنیا یەکێکیان بەهۆی کەوتنەسەر مین بووە و ئەوانی دیکە بە تەقەی ڕاستەوخۆی هێزەکانی کۆماری ئیسلامی بووە.
