ڕێکخراوەکانی مافی مرۆڤ ڕایدەگەیێنن، هاونیشتمانییەکی خەڵکی بۆکان کە ماوەی 10 ڕۆژە لەلایەن هێزە ئەمنییەکانەوە دەستبەسەر کراوە، لە ناوەندە ئەمنییەکاندا "ئەشکەنجەی جەستەیی و دەروونی" دراوە.
بەپێی ڕاپۆرتی ناوەندی مافی مرۆڤی کوردستان، ئیبراهیم مەردانی، هاونیشتمانیی خەڵکی بۆکان، لە دەستبەسەرگەی ئیدارەی ئیتلاعاتی ئەو شارەدا ڕووبەڕووی فشار و ئەشکەنجە بووەتەوە. هەر بەپێی ڕاپۆرتەکە، ناوبراو لە مافە سەرەتاییەکانی وەک "پەیوەندیی تەلەفۆنی، چاوپێکەوتن لەگەڵ بنەماڵەکەی و دەستڕاگەیشتن بە پارێزەر" بێبەش کراوە.
ئیبراهیم مەردانی ئێوارەی سێشەممە، 16ی کانوونی یەکەمی 2025 (25ی سەرماوەز)، لەلایەن هێزە ئەمنییەکانەوە لە شاری بۆکان دەستبەسەر کرا و تاوەکو ئێستا هۆکاری فەرمیی دەستبەسەرکردنەکەی ڕانەگەیێندراوە.
ئەمە یەکەمجار نییە مەردانی دەستبەسەر دەکرێت؛ پێشتر بەهۆی ئەوەی لە ئاهەنگی هاوسەرگیریی کوڕەکەیدا، میوانەکان "جلوبەرگی کوردیی ڕەنگی خاکی"یان پۆشیبوو، لەلایەن دەزگا ئەمنییەکانەوە دەستبەسەر کرابوو.
