لە کاتێکدا ئەمریکا گەمارۆکانی سەر کۆماری ئیسلامی بە هۆکاری پەرەدان بە بەرنامەی مووشەکی و هەروەها ناسەقامگیر کردنی ناوچەکە زیاتر کردووە، وەزیری دەرەوەی ئەو وڵاتە دەڵێ لە ئەگەری نەگۆڕینی ڕەفتارەکانی، گەمارۆکانی سەر کۆماری ئیسلامی زیاتر دەبێت.
ڕۆژنامەی " وطن امروز" کە سەر بە باڵی موحافزەکاری دژبەری دەوڵەتی ڕووحانیە لە لایەک پەیامێکی لە لایەن " ئیدارەی گشتی چاپەمەنییە نێوخۆییەکان و لە لایەک وەزارتی فەرهەنگ و ئیڕشای کۆماری ئیسلامی بڵاو کردووەتەوە کە دەڵێ: بە پێی راگەیندراوی "دەسەڵاتدارانی بەرپرس" و بە مەبەستی پاراستنی هێمنی دەروونی کۆمەڵگە، بڵاو کردنەوەی نێوی کەسەکان و ئەو کۆمپانیایانەی کە لە لایەن ئەمریکاوە گەمارۆیان خراوەتە سەر یاساغ کراوە.
ئەمریکا دەڵێ ئێران گەورەترین پشتیوانی تیرۆریزمە لە ئاستی دونیادا. هەروەها بەرنامەی مووشەکی ئێران و کردەوە ناسەقامگیرانەکانی بووەتە هۆی ئەو گەمارۆیانە. پێشتر وەزارەتی دەرەوەی ئەمریکا چەندین جار و لە چەندین پەیامدا بە خەڵکی ئێرانی گووتبوو کە کۆماری ئیسلامی داهاتی ئەو وڵاتە بەجێگەی خەرج کردن بۆ خەڵکی ئێران، تەرخان دەکات بۆ گرووپی تیرۆریستی وەک حەماس و حیزبوڵلا.
لە کاتێکدا ئەو پەیامە ئاراستەی بەڕێوەبەرانی مێدیاکان کراوە کە حەوتووەکانی ڕابڕدوو دەسەڵاتدارانی کۆماری ئیسلامی داوایان کردبوو کەو ئەو هەواڵانە بڵاو نەکرێتەوە و سانسۆر بکرێن. غولامڕزا جەلالی سەرۆکی پەدافەندی ناعاملی ئێران ڕۆژی سێ شەممە ٢٢ی بەفرانبار لە دانیشتنێکدا گووتبووی: نابێ لاوازییەکانی ئەوڕۆی ئێران کەمتر بکەینەوە و بە ڕوانینێکی دیکە نابێ هیچ پەیامێک کە نیشاندەری لاوازی بێت بڵاو بکرێتەوە.
٢١ی بەفرانبار محەمەد سوڵتانی فەر جێگری کاروباری چاپەمەنی و هەواڵدەری وەزیری فەرهەنگ و ئیرشادی کۆماری ئیسلامی داوای لە ڕۆژنامەنووسان کرد کە لە هەوڵی ئاشکراکردنی هەڵەی بەرپرساندا مەبن.
ڕۆژنامەنووسانی ئێران لەگەڵ ئاسەتنگی زۆر لە بواری بڵاوکردنەوەی ئازادانەی زانیاری و ئاراستەکردنی پرسیار بۆ دەسەڵاتداران ڕووبەڕوون، بەڵام حەسەن ڕوحانی ڕەشەمەی ساڵی ١٣٩٢ بانگەشەی ئەوەی کردبوو کە دەوڵەتی ئەو بە دوای درووستکردنی کەشێکی ئەمنتر بۆ مێدیاکانە بۆ ئەوەی زانیاری راست و درووست بکەویتە دەستی خەڵک.
بەکارهێنەرانی تۆڕە کۆمەڵایەتییەکان لەو بارودۆخەدا وەبیر بڕیاڕەکەی خامنەیی دێنەوە کە لە کاتی گەندەڵی ٣ هەزار ملیاڕد تمەنی لە بانکەکانی ئێران فەرمانی بە ڕۆژنامەکانی ئەو وڵاتە کردبوو ئەو پرسەی هێندە باس نەکەنەوە.
