لە یەکێک لە نەخۆشخانەکانی ئەردەبیل بە هۆی نەدانی تێچووی نەخۆشخانە، ١٥ ڕۆژە ئیزن بە بنەماڵەیەک نادرێ منداڵە تازە لە دایک بوویەکەیان ببەنەوە.
دایکی ئەو منداڵە بە هەواڵدەری ئیلنای گووتوە: ڕۆژی ڕابردوو کاتێک ویستم شیر بە کچەکەم بدەم، پەرەستار منداڵەکەی لە دەستی فڕاندم و ئیزنی نەدا. پەرەستارەکە پێی گووتم تا ئەو کاتەی پاکانە حیساب نەکەی ناهێڵم شیر بە منداڵەکەت بدەی.
بە گووتەی بەرێوەبەرانی نەخۆشخانە، تێچووی خەرجی ئەو منداڵە دوو ملیۆن و٤٠ هەزار تمەنە و بە هۆی هەژاری بنەماڵەی کۆرپە ساواکە کە کرێکاران، ناتوانن خەرجیەکە بدەن.
سەرەڕای بەدواداچوونی بنەماڵەی ئەو زارۆکە و سەردانی زانستگای زانستە پزیشکیەکان و نوێنەری شاری ئەردەبێڵ و سەرۆکی نەخۆشخانەکە بەڵام تا ئیستا هیچ کارێک بۆ چارەسەری کێشەی ئەو بنەماڵە نەدراوە.
تەنانەت وەزارەتی تەندرووستی ئێران لەو پرسە ئاگادار کراوەتەوە و ئەوانیش هیچ وڵامێکیان نەداوەتەوە بەو بنەماڵە هەژارە.
ئێرانی ئەوڕۆ ئێرانی دەسەڵاتداران و بەرپرس و کوڕە بەرپرسانە و خەڵکی هەژار وەک ئەوەی خەڵکی ئەو وڵاتە بە هەژمار نەیەن چاویان لێ دەکرێت.
ڕاگرتنی منداڵێکی تازە لە دایک بوو بۆ ماوەی ١٥ ڕۆژ لە نەخۆشخانە و بارمتە گرتنی بە هۆی هەژاری بنەماڵەکەی و نەبوونی پوڵ بۆ پاکانە حیسابی نەخۆشخانە لە کاتێکدایە کە کۆماری ئیسلامی ڕۆژانە بە خەرج کردنی بە ملیارد پوڵی ئێران مووشەکی نوێ تاقیدەکاتەوە و پوڵ بۆ هێزە تیرۆریستیەکانی ناوچەکە دەنێرێت.
