عەبدوالسەلام جابر وزیری ئیتلاعاتی حوسییەکانی یەمەن کە بە یەکێک لە گرووپە چەکدارەکانی سەر بە ئێران لە ناوچەکەدا دەناسرێت، دوای جیابوونەوە بەرەوە عەرەبستان هەڵات و لەگەڵ ئەوەی خۆی لە ڕێکخڕاوەی حوسییەکان بێبەری کرد، ڕایگەیاند "حوسیەکان خەڵکی سڤیل و منداڵان دەکووژن".
هەواڵدەڕی ئاڵمان بڵاوی کردووەتەوە کە ڕۆژی یەکشەممە ٢٠ گەڵاڕێزان، عەبدوالسەلام جابر لە کۆنفڕانسێکی ڕۆژنامەوانی لە ڕیازی پێتەختی وڵاتی عەرەبستان ڕایگەیاندووە "حوسییەکان موسڵمانی ڕاستەقینە نین و بە نێوی دین خەریکی کوشتنی منداڵانن". لەو بارەوە مایک پەمپئۆ وەزیری دەرەوەی ئەمریکا حەوتووی رابڕدوو گووتبوی "ئێران بەرپرسی بەردەوامی شەڕ، قەلاچۆ و کوشتارە لە یەمەن".
جێگای وەبیر هێنانەوەیە کە ئەو گرووپە میلیشیاییە لە لایەن سوپای پاسدارانی ئێرانەوە پڕ چەک دەکرێت و بەم شیوە کۆماری ئیسلامی تاوانباری سەرەکی کوشتنی منداڵانی یەمەنییە.
وەزیری ئیتلاعاتی حوسییەکان گووتویەتی "ئەو بە هاوکاری دەوڵەتی یاسایی یەمەن خۆی ڕادەستی عەرەبستان کردووە" و باسیشى لەوە کردووە کە وەزیرێکی دیکەی حوسییەکان حەوتووی ڕابڕدوو بەرەوە مالیزی هەڵاتووە و جێگری وەزیری پەروەردەی ئەو گرووپەش خۆی ڕادەستی عەرەبستان کردووە". ئەمەیش وەک نیشانەیەک دەردەکەوێت کە ئەم گرووپە بەرەو پووکانەوە دەچێت و بەمەیش کۆمارى ئیسلامى دەستێکى دیکەى لە ڕۆژهەڵاتى نێوەڕاست کەمتر دەبێتەوە و بە ئەکتیڤبوونى گەڕى دووەمى گەمارۆ ئابوورییەکانى ئەمریکا لەسەر ئێران، ئەو دەستانە بە شێوەیەکى ئۆتۆماتیکى لاواز و وڵاتەکان بەرەو هێورى هەنگاو دەنێن کە ئەمەیش یەکێکە لە ئامانجەکانى ویلایەتە یەکگرتووەکان سەبارەت بە گەمارۆ ئابوورییەکانى سەر کۆمارى ئیسلامى.
