ئەمڕۆ چوارشەممە حوسێن سەلامی فەرماندەیەکی سوپای پاسداران لە مەراسیمى کردنەوەى پڕۆژەی عومرانى ئایەتوڵا عەلى خامنەیی لە ورمێ، قسەى لەسەر ڕۆژهەڵاتى کوردستان و حیزبە کوردییەکان و باشوورى کوردستان و ملشیا شێعەکان کرد کە کۆمارى ئیسلامى پاڵپشتییان لێ دەکات بۆ پەرەدان بە ئاژەوەگێڕى و تیرۆریزم لە ناوچەکە دژ بە وڵاتان.
حوسەین سەلامى هێرشى کردە سەر حیزبە کوردییەکانى رۆژهەڵات و بە فیتنەگەرى ناو بردن کە "دەیانهەوێت ئێران دابەش بکەن و ئیرادە پیسەکەیان بەسەر خەڵکى ئێراندا بسەپێنن". ئەم فەرمادەیەى سوپاى پاسداران کە بە فەرمانى خامنەیی جێگەى محەمەد عەلى جەعفەرى گرتەوە، باسى سنوورەکانى نێوان ڕۆژهەڵات و باشوورى کرد کە بوونەتە دەروازەى هاتنى پێشمەرگەکان بۆ نێو خۆى ڕۆژهەڵات و هەروەها بە ئاشکرا باسى پشتیوانییەکانى کۆمارى ئیسلامى بۆ بریکارەکانى لە عێراق و سوریە و لوبنان و یەمەن کرد و گوتى "ئەوان هاوکارى ئێمەن و ئێمە پشتیوانییان دەکەین بۆ دژایەتى ئیسرائیل و ئەمریکا لە ناوچەکە".
لێرەدا چەندین ڕستە لە قسەکانى فەرماندەى گشتى سوپاى پاسداران کە ئەمرۆ لە ورمێ قسەى کرد، وەک خۆى دادەنێیتەوە:
ڕۆژهەڵاتى کوردستان و حیزبە کوردییەکان:
ـ کوردستان دەروازەى هاتنى دوژمنە بۆ دزەکردنە نێو ئێران.
ـ ئێرە (کوردستان) خاڵێک بووە کە دوژمن بەردەوام ویستوویەتى دەستى بە چارەنووسى ئەم گەلە ڕابگات.
ـ سیما و ڕووخسارى پیاوانى ئەم هێڵە (ئاماژەکردن بە کێوەکانى سنوورییەکانى کوردستان) بە قەدرا بەرزاییەکانى حاجى ئۆمەرانە.
ـ خەڵکى ئەم ناوچەیە هەروەک سرووشت و کێوەکانى کوردستان، پارێزەرى شکۆى گەلى ئێرانن.
ـ دوژمنەکانمان (حیزبە کوردییەکانى ڕۆژهەڵات) بڕیاریان داوە ئێران دابەش بکەن و ئیرادەى شوومى خۆیان بەسەر خەڵکى ئەم سەرزەمینەدا بسەپێنن.
ـ خەڵکى ئەم ناوچەیە بۆ بەرگریکردن لە ئاسایش و ئارامى هاووڵاتییەکانیان دەستیان داوەتە چەک (مەبەستى جاشەکان بوو).
ـ کوردستان شوێنگەیەکە بۆ شکستى پیلانەکانى ٤٠ ساڵى دوژمن.
ـ ئێرە سەرزەمینى لەگۆڕنانى فیتنەکان و لاشەى سیاسەتى دوژمنە گەورەکان.
ئەمریکا و گفتوگۆ:
ـ خواستى ئەمریکا بۆ گفتوگۆ، جۆرێکە لە فێڵ و تەڵەکە.
ـ گفتوگۆى ئەمریکا، گفتوگۆیەکى لەبیرکراوە لە نێو زەینى خەڵکى ئێراندا.
ـ هەموو ئەو شتەى دوژمن دەیڵێت، ڕەچەتەى شکستى ئێمەیە.
ـ گفتوگۆ فێڵێکى ئەمریکا بووە، نەوەک چارەسەر.
ئێران و ناوچەکە:
ـ سیاسەتەکانی واشنتۆن بوونەتە هۆی بەهێزبوونی ئێران لە ناوچەکە.
ـ ئەم بەهێزبوونەى ئێرانیش هۆکار بووە بۆ دروستکردنى بەرەیەکی یەکگرتوو لە ناوچەکە دژ بە ئیسرائیل و ئەمریکا.
ـ ئێران پشتیوانی هەریەک لە حیزبوڵای لوبنان و حوسییەکان یەمەن و حەشدی شەعبیی عێراق دەکات.
ـ حیزبوڵای لوبنان توانیویەتی دەسکەوتی باشى هەبێت و بەسەر ئیسرائیلدا سەرکەوێت.
ـ حوسییەکانی یەمەن توانیویانە بەسەر سیاسەتەکانی ئەمەریکا لەو وڵاتە سەرکەوتووبن.
ـ ڕۆڵی حەشدی شەعبی لە پووچەڵکردنەوەى سیاسەتەکانی ئیسرائیل و ئەمەریکا لە عێراق، سووریا و یەمەن جێگەى ستایشن.
ـ حەشدی شەعبی توانیویەتی بەر بە پراکتیزەبوونى پلانەکانی ئەمەریکا لە عێراق بگرێت
ـ ڕێگە نادەین ئەمەریکا بە ئارەزووی خۆی سیاسەتەکانی لە ناوچەکە جێبەجێ بکات.
