دەسەڵاتدارێکی پلەبەرزی وەزارەتی ناوخۆی ئەفغانستان بە هەواڵدەری ئاسۆشێتدپرێسی گوتووە نزیکەی دە هەزار کەس لە هاووڵاتیانى ئەفغان کە لە لایەن سوپای پاسدارانەوە مەشقیان پێ کراوە و لە سوریە شەڕیان کردووە، گەڕاونەوە بۆ ئەفغانستان.
بە پێی ڕاپۆڕتەکەی ئاسۆشێتدپرێس کە ڕۆژی دووشەممە ١٢ خاکەلێوە بڵاو بووەتەوە ئەو دەسەڵاتدارە لەگەڵ وردەکارییە زانیارییەکانی دەوڵەتی ئەفغانستان ئاشنایە. بە پێی نووسراوی ئەو هەواڵدەرییە دەوڵەتی ئەفغانستان و زۆربەی کارناسان گریمانەى ئەوە دەکەن کە ئێران جارێکی دیکە ئەو هێزە شێعەیە ڕێک بخاتەوە و لە ئەفغانستان بە قازانجی سیاسەتەکانی خۆی بەکاریان بهێنێت و بەمەش هەوڵەکانی ئەمریکا بۆ هێورکردنەوەى ئەفغانستان پووچەڵ ببنەوە.
بە گووتەی ئەو دەسەڵاتدارە، کۆماری ئیسلامی ئێستا خەریکی هاوکاریکردنی ئەو میلیشیایانەی فاتمیونە کە لە کابول و ناوچەی شێعەنشینی بامیان نیشتەجێ بوونە. لەشکری فاتمیون ئەو چەکدارە ئەفغانیانەن کە سوپای پاسداران بۆ ناردن بۆ سوریە و شەڕکردن وێرای هێزەکانی بەشار ئەسەد دژی دژبەرەکانی، ڕێکی خستوون.
