کۆڕبەندی ساڵانەی ئەدەبیی 'پێنووس'ی لە ئیلام بەڕێوەچوو، ئەم کۆڕبەندە کە تایبەت بوو بە شیعر، چیرۆک و پادکاستی ئەدەبی بە زمانەکانی کوردی و فارسی، لە لایەن قوتابخانەی ناوەندیی کچانەی فەرزانەگانی ئیلامەوە و لەسەر ئاستی پارێزگای ئیلام ڕێکخرابوو.
هۆڵی کۆڕبەندەکە پڕ بوو لە قوتابیی پڕ حەماس و وزە، کە زۆربەیان کچ بوون. بەڕێوەبردنی تەواوی بەرنامەکان لە ئەستۆی قوتابیاندا بوو کە بە جلوبەرگی ڕازاوەی ناوچەییەوە چالاکییە جۆراوجۆرەکانیان پێشکەش دەکرد.
ئەم قوتابییە تازەپێگەیشتووانە هەوڵیان دەدا بە زمانی دایکی بدوێن و ڕەگ و ڕیشەی خۆیان بە بنەما فەرهەنگییە ڕەسەنەکانیانەوە ببەستنەوە. قوتابیانی بەشداربوو لە سەرانسەری پارێزگای ئیلامەوە هاتبوون و بە کوردی و فارسی شیعر و چیرۆکیان دەخوێندەوە، مۆسیقایان دەژەند و شانۆگەرییان پێشکەش دەکرد.
ژمارەیەک لە شاعیران و ئەدیبانی ناسراوی پارێزگای ئیلام، لەوانە دکتۆر حەبیب بەخشوودە، فەرهاد شــاهمورادیان، دکتۆر ئارەش پاڵیزبان، حوسێن شکەربەیگی، داریووش هیمەتی و مەهدی ئارمانی، ئامادەی کۆڕبەندەکە بوون و زۆربەیان وتار و شیعریان بۆ قوتابیان پێشکەش کرد.
