کەناڵی ١٢ی ئیسرائیل لە ڕاپۆرتێکدا بە گێڕانەوە لە سەرچاوە ئاگادارەكان، هۆشداریی ئیسرائیلی بۆ کۆماری ئیسلامی ڕاگەیاند.
بە پێی ئەم ڕاپۆرتە لە ڕێگەی کەناڵە دیپلۆماسییەکانەوە پەیامێک بۆ ئێران نێردراوە و بە پێی ئەو پەیامە ئیسرائیل لە ئەگەری هێرشێکی بەرفراوان لەلایەن کۆماری ئیسلامی و بریکارەکانییەوە ئامادەیە شەڕێکی تەواو بکات.
هەر لەم پێوەندییەدا، بنیامین ناتانیاهۆ، سەرۆک وەزیرانی ئیسرائیل ڕایگەیاند: "هەر لە سەرەتای شەڕەوە بە ڕوونی وتوومانه کە ئێمە لە دۆخی شەڕ لەگەڵ میحوەرین، واتە کۆماری ئیسلامی".
ئەو زیادی کرد: "ئەمە شەڕێکی تەواوەتییە لەگەڵ گرووپە تیرۆریستییەکان. حەماس و حوسییەكان و حیزبوڵڵا قۆڵی ئەم میحوەرەن و لە چەند ڕۆژی ڕابردوودا گورزێکی كوشندەمان لە هەریەکەیان داوە".
جێگای ئاماژەیه ڕۆژی چوارشەمه، ١٠ی گەڵاوێژی ١٤٠٣ی هەتاوی، هێزی بەرگری ئیسرائیل له ئۆپراسیۆنێکی زۆر ورد و پێشکەوتوو، ئیسماعیل هەنیه، گەوره تیرۆریستی فەڵستینیی کوشت.
