تۆڕى میدیایی ئاڤاتودەى، پیرۆزبایی لە پڕۆفیسۆر کۆچەر بیرکار کرد کە نیشانەى فێڵدس ـى بیرکارى لە وڵاتى بەریتانیا پێ بەخشرا. ئەمەى خوارەوە دەقى پیرۆزبایینامەکەیە:
بەڕێز پڕۆفیسۆر فەریدون درەخشانى (کۆچەر بیرکار)
وەک تۆڕى میدیایی ئاڤاتودەى پیرۆزبایی سەرکەوتن و بەخشینى نیشانەى فێڵدس ـتان لێ دەکەین کە نیشانەیەکى درەوشاوە و دەستکەوتێکى مەزنە بۆ جەنابتان و بنەماڵە بەڕێزەکەتان و هەموو تاکێکى کورد لە هەر شوێنێکى دونیادا بێت.
بەداخەوە لە ئێرانى بن دەستى کۆمارى ئیسلامى، لاوانى دەستەبژێر و بەهرەمەند جگە لە جێهێشتنى وڵات هیچ چارەیەکى دیکەیان نەبووە و نییە و هەر ئەمەیش واى کردووە کە شەپۆلى هەڵاتنى مێشکەکان لە ئێران بەردەوام بێت و بە هەزاران زانا و کەسى لێهاتوو و بەنێوبانگ بە ڕێگەى قاچاخ خۆیان بگەیێننە وڵاتانى ئەوروپا و ئەمریکا تا لەوێ ئامانجەکانیان بەدى بێنن. هیچ وڵاتێکى پێشکەوتوو شک نابەین کە دەیان کەسى بەنێوبانگ و زاناى کورد و ئێرانى تێدا نیشتەجێ نەبووبن کە جێگەى ڕێز و شانازى ئەو وڵاتانە و هەموو دونیان.
ڕۆژهەڵاتى کوردستان بەدەر لەوەى پەراوێز خراوە، هەمیشە وەک ناوچەیەکى ئەمنی سەیر کراوە و ئەمەش واى کردووە کە لاوانى بەهرەمەندى کوردى ڕۆژهەڵات هەم لەبەر کوردبوون و هەم لەبەر بێ دەرەتانى و نەبوونى کار دوو جار بچەوسێنرێنەوە و لە ناچارییان کۆڵبەری بکەن کە وەک پیشە هەژمار ناکرێت. باقر ئەحمەدى، لاوى دەستەبژێر و بیرکاریزانى مەریوانى نمونەى ئەو کەسانەیە کە جگە لەوەى دوکتۆراى هەیە، خەریکى کۆڵبەرییە لە نێو سنوورەکانى ڕۆژهەڵات و باشوورى کوردستان و ئیدریس درەخشانى کە لە ساڵى ١٣٨٨ لە زانکۆى سەهەند دەرکراوە و خوێندکارى ستارەدارە، یەکێکە لە خزمەکانى کۆچەر بیرکار کە ئەویش وەک دەیان لاوى نەناسراوى دیکە قوربانى سیاسەتەکانى کۆمارى ئیسلامییە لە ڕۆژهەڵاتى کوردستان و ئێران.
دووبارە پیرۆزبایی لە جەنابتان دەکەین و بە هیواى دەستکەوتى گەورەتر و بەدیهێنانى شانازى بۆ گەل و نیشتمان
تۆڕى میدیایی ئاڤاتودەى
١١ى گەلاوێژى ١٣٩٧ى هەتاوى
٢ى ئاگۆستى ٢٠١٨ى زایینى
