هێزی ئینتیزامی کۆماری ئیسلامی بە بیانووی جۆراوجۆری وەک نەبوونی ڕێگەپێدانى ماتۆڕلێخوڕین، بیمە و نەبوونی کڵاوی خۆپاراستن و پیسبوونی ئاو و هەوا، ماتۆڕی خەڵک زەوت دەکات و بە شێوەی نایاسایی دەیانفرۆشێتەوە.
هێزی ئینتیزامی کە ئەرکەکەی دابینکردنی ئاسایش و تەناهی کۆمەڵگەیە، بۆتە ناوەندێکى باش بۆ پڕکردنی گیرفانی و خەزینەی سوپاى پاسدارانى کۆماری ئیسلامی. ئەو هێزە بە بیانووی جۆراوجۆر دەست بەسەر ماتۆڕی خەڵکدا دەگرێت و دوای ڕاگواستنیان بۆ پاڕکینگ دەست دەکات بە فرۆشتنەوەیان.
تێچووی وەرگرتنەوەی ئەو ماتۆرانە گەلێک زۆرە، هەر بۆیە خەڵک خۆی دەبوێرێ لە وەرگرتنەوەیان، لەوەها باردودۆخێکدا هێزی ئینتیزامی کە بەتەواوەتی لە ژیڕ ڕکێفی سوپا و وەزارەتی ئیتلاعاتدایە، بە شێوازێکی نایاسایی دەست دەکات بە فرۆشتنەوەی ئەو ماتۆڕانە، لە کاتێکدا زۆرێک لە خەڵکى ئێران بە هۆى هەژارى و پەیداکردنى دوو پارووە نان ماتۆڕ دەکڕن و هاتوچۆى پێ دەکەن.
