کۆماری ئیسلامیی ئێران سزای لەسێدارەدانی بەسەر عەبدولجەلیل شەبەخش، زیندانیی سیاسیی بەلووچدا جێبەجێ کرد؛ ئەمەش لە چوارچێوەی شەپۆلێکی نوێی لەسێدارەدان کە هاوکاتە لەگەڵ پەرەسەندنی گرژییە سەربازییەکانی وڵاتەکە.
ئاژانسی "میزان"ی سەر بە دەسەڵاتی دادوەریی ئێران ڕایگەیاند، شەبەخش بە تۆمەتی ئەندامێتی لە گرووپی چەکداریی سوننەمەزهەبی "ئەنسارولفەرقان" و وەرگرتنی مەشقی سەربازی لە دەرەوەی وڵات، بەرەبەیانی ڕۆژی سێشەممە لەسێدارە دراوە. هاوکات ڤیدیۆیەکی "دانپێدانان"یشی بڵاوکراوەتەوە کە ڕێکخراوەکانی مافی مرۆڤ گومانیان لە بارودۆخی تۆمارکردنی هەیە.
چالاکوانانی بەلووچ جەخت دەکەنەوە کە شەبەخش زیندانییەکی سیاسی بووە و لە کاتی خۆپیشاندانەکانی ساڵی ٢٠٢٢دا دەستگیر کراوە. نەتەوە یەکگرتووەکانیش هۆشداری دەدەن کە تاران سزای لەسێدارەدان وەک "ئامرازێک بۆ سەرکوتکردنی نەیارانی سیاسی لە بارودۆخی جەنگدا" بەکاردێنێت.
