شەپۆلێکی گەرمای بێوێنە ڕۆژهەڵاتی کوردستانی گرتووەتەوە و بووەتە هۆی ڕاگرتنی کار و دەوامی فەرمی لە پارێزگاکانی کرماشان، سنە، ورمێ و ئیلام. بەرپرسانی حکومی بە مەبەستی ڕێگریکردن لە پچڕانی کارەبا و کەمکردنەوەی فشار لەسەر تۆڕی دابەشکردن، بڕیاری داخستنی زۆربەی فەرمانگە و بانکەکانیان داوە.
ڕێکارەکان لە پارێزگاکان:
بۆ ڕووبەڕووبوونەوەی ئەم دۆخە، هەر پارێزگایەک ڕێکاری تایبەتی گرتووەتەبەر:
-
کرماشان و سنە: ڕۆژی چوارشەممە کراوەتە پشووی فەرمی بۆ سەرجەم فەرمانگە، دامەزراوە حکومییەکان و بانکەکان.
-
لەمبارەیەوە، جەلال باڵایی، جێگری پارێزگاری کرماشان، ڕایگەیاند: "ئەم بڕیارە بە مەبەستی کەمکردنەوەی بەکارهێنانی کارەبا و ڕێگریکردن لە پچڕانی لە کەرتی ماڵان، بازرگانی و پیشەسازیدایە."
-
-
ورمێ: ڕۆژانی سێشەممە و چوارشەممە دەوامی فەرمانگەکان کراوەتە ئۆنلاین و ناوەندەکانی خوێندن داخراون.
-
ئیلام: دەوامی ڕۆژی سێشەممە دوو کاتژمێر کەم کرایەوە و ڕۆژی چوارشەممەش کارکردن لە ماڵەوە (ئۆنلاین) بەڕێوەدەچێت.
پلەکانی گەرمای پێوانەیی و فشاری سەر تۆڕی کارەبا
ئەم بڕیارانە لە کاتێکدان کە پلەکانی گەرما لە ناوچەکەدا ئاستی پێوانەیییان تۆمار کردووە. بۆ نموونە، لە شاری دێلران سەر بە پارێزگای ئیلام، پلەی گەرما گەیشتووەتە ٥١ پلەی سیلیزی. بەپێی ڕاپۆرتەکان، تۆڕی کارەبا بەهۆی بەکاربردنی زۆرەوە تووشی "ناهاوسەنگی" بووە و فشارێکی زۆری لەسەرە.
هۆشداری بۆ هاووڵاتیان
هاوکات هۆشداریی توند دراوەتە هاووڵاتیان، بەتایبەت بەساڵاچووان، منداڵان و زیارەتکارانی ئەربەعین، کە لە کاتەکانی گەرمای نیوەڕۆدا لە چوونە دەرەوە خۆیان بەدوور بگرن. هەروەها پێشبینی دەکرێت لە ناوچە سنوورییەکان مەترسیی دروستبوونی گەردەلوول و تۆز و خۆڵ لە ئارادا بێت.
جێی باسە، ئەم پشووە فەرمییانە دامەزراوە خزمەتگوزارییە گرنگەکان وەک ناوەندە تەندروستییەکان، هێزە فریاگوزاری و ئەمنییەکان ناگرێتەوە و ئەوان لە ئەرکەکانیان بەردەوام دەبن.
