وەزیری دەرەوەی فەرەنسا ڕایگەیاند، مۆڵەت بۆ گەیشتن بە ڕێککەوتنێکی نوێ بۆ سنووردارکردنی بەرنامە ئەتۆمییەکەی ئێران کەمە و هۆشداریدا ئەگەر ڕێککەوتن نەکرێت، ڕووبەڕووبوونەوەی سەربازی "زەحمەتە روونەدات."
ژان نوئێل بارۆ لە پەرلەمانی فەرەنسا وتی: "تەنها چەند مانگێکمان ماوە بۆ کۆتاییهاتنی رێککەوتنی ئەتۆمی." هەروەها جەختی کردەوە: "لە ئەگەری سەرنەکەوتندا، وادیارە ڕووبەڕووبوونەوەی سەربازی ئەگەری زۆرە ببێتە ئەمری واقیع."
هاوکات، ئاژانسی هەواڵی ڕۆیتەرز لە زاری سەرچاوە دیپلۆماسییەکانەوە بڵاویکردەوە کە ئیمانوێل ماکرۆن، سەرۆکی فەرەنسا، ئەمڕۆ (چوارشەممە) کۆبوونەوەیەکی گرنگی لەگەڵ وەزیرە باڵاکانی کابینە و شارەزایانی کاروباری ئێران و بەرنامە ئەتۆمییەکەی سازکردووە. ئاماژە بەوەشکراوە کە کۆبوونەوەیەکی لەم شێوەیە تایبەت بە بابەتێکی دیاریکراو لە حکومەتی فەرەنسادا دەگمەنە.
سێ سەرچاوەی دیپلۆماسی بە ڕۆیتەرزیان گوتووە، کۆبوونەوەکە بەهۆی زیادبوونی نیگەرانییەکان لە گرژییەکانی نێوان تاران و واشنتۆنەوە بەڕێوەچووە.
چاودێران ئەم کۆبوونەوەیە بە نیشانەی نیگەرانیی زیاتری وڵاتانی ئەوروپا دەزانن سەبارەت بە ئەگەری هێرشی سەربازیی ئەمریکا و ئیسرائیل بۆ سەر دامەزراوە ئەتۆمییەکانی ئێران، ئەگەر دانوستانەکان شکست بهێنن.
سەرچاوە دیپلۆماسییەکان ئاماژە بەوە دەکەن کە وەزیرانی دەرەوەی فەرەنسا، بەریتانیا و ئەڵمانیا هیوادارن لە کۆبوونەوەی داهاتووی ناتۆ لە برۆکسل لەگەڵ مارکۆ رۆبیۆ، وەزیری دەرەوەی ئەمریکا، گفتوگۆ لەبارەی ئێرانەوە بکەن.
ڕۆیتەرز لە زاری بەرپرسێکی باڵای ئەوروپییەوە بڵاویکردەوە کە هەندێک شیکار پێیان وایە هێرشەکانی ئەمریکا بۆ سەر حوسییەکان لە یەمەن لە ماوەی دوو هەفتەی ڕابردوودا، لەوانەیە پێشەکییەک بێت بۆ ئەنجامدانی هەنگاوی سەربازیی بەرفراوانتر دژی ئێران.
کۆبوونەوەکەی حکومەتی فەرەنسا چەند کاتژمێرێک دوای ئەوە بەڕێوەچوو کە وەزارەتی بەرگریی ئەمریکا (پێنتاگۆن) لە بەیاننامەیەکی کورتدا ڕایگەیاند، بە فەرمانی پیت هۆگۆست، وەزیری بەرگریی ئەمریکا، هێزەکانی ئەو وڵاتە لە ڕۆژهەڵاتی ناوەڕاست بە ناردنی فڕۆکەی جەنگیی زیاتر بەهێزکراون.
ڕۆژی ڕابردووش، مایکڵ مەککۆڵ، سەرۆکی لیژنەی پەیوەندییەکانی دەرەوەی ئەنجومەنی نوێنەرانی ئەمریکا، لە پەیامێکدا بۆ عەلی خامنەیی، ڕێبەری ئێران، ڕایگەیاند کە "سەرۆک بایدن ئامادەیە بە شێوەیەکی ئاشتییانە هاوکاریتان بکات بۆ ئەوەی کۆتایی بە بەرنامە ئەتۆمی و مووشەکە بالیستییەکانتان بهێنن." ناوبراو وتیشی: "ئێستا هەڵبژاردن لە دەستی ئێوەدایە."
