ڕۆژی یەکشەممە ٢٨ی گەلاوێژی ١٤٠٣ی هەتاوی، هێزەکانی سنووری عێراق لە سنووری هەورامان تەقەیان لە کۆڵبەران کرد و لە ئەنجامدا کۆڵبەرێک بە ناسنامەی "ئارام خەلیل" خەڵکی هەرێمی کوردستان، کوژرا.
هاوڕێیەکی ئارام خەليل بە پەیامنێری رووداوی گوت: "رۆژانە کۆڵبەری دەکرد، ئەمشەوی ڕووداوەکه نزیکی کاژێر ٨ی شەو، دوای دەرچوونی لە پاسەوانەکانی سنوور، دەستڕێژی گولـلەی لێکراوە و کوژراوە".
گوتیشی، ئارامیان بە برینداری گواستەوە بۆ نەخۆشخانە، بەڵام بەهۆی سەختیی برینەکەیەوە، کە گوللەیەک بەر سنگی کەوتبوو، گیانی لەدەستدا.
ئارام خەليل دایک و باوکی لە ژیان نەماون، خۆی رۆژانە بە کۆڵبەری برا و خوشکەکانی دەژیاند.
هەر لەم پەیوەندییه، حەمەی حەمەسەعید، وەزیری رۆشنبیریی حکومەتی هەرێمی کوردستان، به بەڵاو کردنی نامەیەک لەمبارەوه وتی: " بەداخەوە ھێزەکانی پاسەوانی سنوور کاریان پاسەوانی و پاراستنی خەڵکە نەکوشتن و شەھیدکردنیان".
حەمەی حەمەسەعید، لە نووسینەکەیدا باسی رووداوی دیکەی کوشتن دەکات و دەڵێت: "پار ھەر لە ھەمان شوێن کەسێکیتریان کوشت، لەلایەن کۆمەڵایەتی ھەورامانەوە سوڵحیان بۆکرا، من و کاک جەمیل ھەورامی نیوەی زیاتری پارەی سوڵحەکەشمان لە یەکێتی نیشتمانی بۆ دان، ئەوەی بکوژەکان دایان قەرزیان بۆکرا ھێشتا قەرزەکەیان نەداوەتەوە".
