● دکتۆر محەمەدئەمیر سەماواتیان (دەروونناس)
١. کچە ۱۷ ساڵەکەم، قوتابیی نایابی بەشى بیرکارییە و لە قوتابخانەیەکى ئامادەیی نموونەیی ـ دەوڵەتى لە تاران.
٢. مانگێک بەر لە جێژن، بە ئاگادارى من و دایکى، ڕەنگى قژى گۆڕی بۆ "قاوەییەکى ڕوون" و ئێستا هەڵبەتە نزیکەى ٢ مانگە، ڕەنگە "ڕەش"ـەکەى قژەکەى زیاتر بووەتەوە، بەڵام بەداخەوە هێشتا سەرى تاڵە مووەکانى قاوەییەکى تۆخن!
٣. تکایە سەرەنج بدەنە ئەم گفتوگۆ باوک ـ کچانەیەی کە تایبەتە بە ١٤ى خاکەلێوەى ئەمساڵ:
- باوکە!
+ گیان!
- چ لە سبەى بکەم؟
+ چی چ بکەى؟!
- بڕیار وایە بەڕێوەبەر خۆى بێت و تەماشاى قژمان بکات!
+ دەى با بێت، بۆ مەگەر لەسەر ئەوە لە قوتابخانە دەرت دەکەن؟
- نا! دەبێت مەقنەعەکەمان لابەرین، تا تەماشاى قژمان بکەن کە ئاخۆ ڕەنگمان کردوون یان نا!
+ تەماشاى قژى بن مەقنەعەکانتان بکەن؟!
- بەڵێ! تێرمی پێشوو هاتنە نێو پۆل و بە هەموویان گوت مەقنەعەکانتان داکەنن. یەکێک لە کچەکان قژى ڕەنگ کردبوو، بەڕێوەبەر پێى گوت: نمرەى ئاکارت کە هیچ، بەڵکو ئاگادار بە لە تۆمارکردنى ناوت بۆ ساڵى ئایندە تووشى کێشە نەبیت!)
+ چیترى گوت؟
- گوتى: (ئەگەر شتێکى ئاکارى بۆتان بێتە پێش، زانکۆ وەرتانناگرێت)!
٤. کچە قوتابییەکەم، لە دوێنێوە تووشى "سترێسێکى زۆر" بووە لەسەر ئەوەى کە لە نێو پۆل و ئەویش لە نێو قوتابخانەیەکى نمونەیی ـ دەوڵەتى، مەقنەعەکەى پێ لابەرن و تەماشاى قژى بکەن تا قژى قاوەییەکەى بەر لە دوو مانگى کە ئێستا ڕەشایەتییەکەیان بۆ گەڕاوەتەوە... ئەو دەترسێت کە نەکا نمرەى ئاکارى بشکێنن و ساڵى دواتر ناوى تۆمار نەکرێت و ڕێگە نەدرێت بچێتە زانکۆ و ...
٥. منى باوک، چ لەو سترێسە نوێیەى کچەکەم بکەم، کچێک کە ساڵى پێشوو سترێسى باتۆم و هێرشە ئەمنیەتییەکانى سەر قوتابخانەکانى هەبوو و دواتر بووە سترێسى گازى شیمیایی؟
ئەم هاوارە بۆ کوێ بەرم؟ هاوار بۆ کێ بکەم کە قژى ژێر مەقنەعەکەى کچەکەم هیچ پەیوەندییەکى بە ئێوەوە نییە؟ چلۆن دەکرێت ئەم وەحشیگەرییە ڕابگیردرێت؟!
