سوپاى پاسداران لە ڕێگەى فارس ئەیر قشم و کۆمپانیاى "کانویاسا"ى ڤەنزوێلا کە ساڵى ڕابردوو بە هۆى هاوکارى لە قاچاخى چەک بە ماهان ئەیر لە لایەن ئەمریکاوە گەمارۆى خرایە سەر، ئێستا خەریکى قاچاخى ماددەى هۆشبەر و زێڕە!
بە پێى هەواڵى گەیشتوو بە تۆڕى میدیایی ئاڤاتودەى، بەیانى ئەمڕۆ سێشەممە ٦ى گەڵاڕێزان (ئابان)ى ١٣٩٩، فڕۆکەى بوئینگ ٧٤٧ى فارس ئەیر قشم، بڕێکى زۆر چەک و ماددەى هۆشبەرى لە تارانەوە ناردووى بۆ دوورگەى "ئیسپارگۆس" لە وڵاتێکى بچووک و دوورکەوتە بە ناوى "کەپ ڤێرد ـ CAPE VERDE " لە ڕۆژئاواى ئەفریقا.
فڕۆکەى فارس ئەیر قشم بۆ شاردنەوەى ئاراستەکەى خۆى، لە توونس وەستانێکى کورتى هەبووە و دواتر درێژەى بە ڕێگەکەى خۆى داوە.
ناردنى ماددەى هۆشبەر و چەک و هەڵگرتنى زێڕ لە ڕۆژئاواى ئەفریقا لە لایەن سوپاى پاسدارانەوە، تەواو بە نهێنى ئەنجام دەدرێت و دراوە.
بە پێى ڕاپۆرتى سەرچاوەکەى ئاڤاتودەى، بڕیارە ماهان ئەیر فڕۆکەیەکى بوئینگ ٧٤٧ بداتە ڤەنزوێلا بۆ خێراترکردنى ئەم قاچاخە. فڕۆکە هەڵگرەکانى چەک و ماددەى هۆشبەر و زێڕ، کە لە تارانەوە بەرەو کاراکاس دەڕۆن، لە نزیکى موریتانى سیستەمى (TCAS)ى خۆیان دەکوژێننەوە تا سادەتر بگەنە شوێنى مەبەست لە ڤەنزوێلا.
