سێرگى شویگۆى وەزیرى بەرگرى ڕوسیە گوتى کە وڵاتەکەى لە ڕەزبەرى ٢٠١٥ى زایینییەوە تا ئێستا و بۆ بەرگرى لە هێزەکانى بەشار ئەسەدى سەرۆککۆمارى سوریە کە دژ بە کوردەکان و داعش لە شەڕدایە، زیاتر لە ٢١٠ جۆر چەکى تاقی کردووەتەوە.
بە پێى ڕاپۆرتى هەواڵنێرى تاس، سێرگى شویگۆى وەزیرى بەرگرى ڕوسییە باسى لەوە کردووە کە هێزە سەربازییەکانى ڕوسیە ئەزموونێکى زۆریان لە سوریە بەدەست هێناوە و لەم بارەوە گوتى "ئێمە زیاتر لە ٢١٠ چەکمان تاقی کردووتەوە. ئەو چەکانەمان لەگەڵ سورییەکان و لە مەیدانى شەڕدا تاقی کردووەتەوە" و شویگۆ خۆشبینى خۆشى دەربڕیوە کە تاقیکردنەوەى ئەم چەکانە دەبێتە هۆى ڕزگاربوونى گیانى مرۆڤەکان.
ڕوسیە لە ڕەزبەرى ساڵى ٢٠١٥ەوە تا ئێستا بۆ بەرگریکردن لە دەوڵەتەکەى بەشار ئەسەد چووەتە نێو سوریاوە. ڤلادیمێر پۆتینى سەرۆککۆمارى ڕوسیا سێ مانگ بەر لە ئێستا سەرەڕاى چاوپێکەوتنى بەشار ئەسەد، سەردانى بنکە سەربازییەکەى وڵاتەکەشى لە حەیمیم کرد.
