دەزگا ئەمنییەکانی کۆماری ئیسلامیی ئێران لە شاری بۆکان، گوشارەکانیان بۆ سەر هونەرمەندان و گۆرانیبێژان چڕ کردووەتەوە و ڕێگرییان لێ دەکەن گۆرانیی نەتەوەیی و نیشتمانی بڵێن.
بەگوێرەی ڕاپۆرتێکی ڕێکخراوی مافی مرۆڤی "کوردپا"، ئیدارەی ئیتلاعاتی بۆکان لە ڕێگەی پەیوەندیی تەلەفۆنییەوە هەڕەشەی لە گۆرانیبێژ، ژەنیار و خاوەن ناوەندە مۆسیقییەکان کردووە کە نابێت هیچ جۆرە سروود و گۆرانییەکی "شۆڕشگێڕی و نەتەوەیی" بڵێن؛ دەزگا ئەمنییەکان ئەو جۆرە چالاکییانەیان وەک "دژە شۆڕش" ناساندووە.
لە هۆشدارییەکەدا ئەوەش هاتووە، هەر هونەرمەندێک پابەندی بڕیارەکان نەبێت و بەردەوام بێت لە بڵاوکردنەوەی بەرهەمی نیشتمانی، ڕووبەڕووی دەستگیرکردن و سزای توند دەبێتەوە.
