بە هۆى لاوازى و یارمەتینەدان و بەهاناوەنەچوونى کۆمارى ئیسلامى، دۆخى بوومەلەرزەلێدراوان خراپ و خراپتر بوو و دەنگى ناڕەزایەتى زۆرێک لە لێقەوماوان بەرز بووەوە، بۆیە شارە کوردییەکانى وەکو سنە و سەقز و ئیلام و ورمێ و بۆکان و مەهاباد و شنۆ و پیرانشار وسەردەشت و زۆرى تریش دەستیان بە کۆکردنەوەى کەلوپەل و هاوکارى ماددى کرد و هەر کەسەو بە پێى توانا و بە ئۆتۆمبێلى خۆى هاوکارییەکانى گەیاندە دەستى بوومەلەرزەلێدراوان، چونکە بڕوایان بە ناوەندە حکومییەکان و دامەرزاوەکانى وەک هیلالى ئەحمەر نەبوو بۆ گەیاندنى کەلوپەلەکانیان.
ئەبووبەکر مەعرووفى کە پیاوێکى بەتەمەنى دڵسۆزى بۆکانى بوو، لە کاتى گواستنەوەى کەلوپەل بۆ لێقەوماوان ئۆتۆمبێلەکەى وەرگەڕا و گیانى لەدەست دا. بۆیە ئاڤاتودەى لە کاتى هێنانەوەى تەرمەکەى هەڵمەتێکى گەورەى دەست پێ کرد تا خەڵکى وەک وەفایەک بێنە پێشوازییەوە، چونکە سوپا و ئیتلاعات دەیانهەویت ڕێگرى بکەن لە گواستنەوەى تەرمەکە تا خەڵک نەیێنە پێشوازى.
ئێستا و پاش تێپەڕینى ماوەیەکى زۆر لەسەر ئەو کارەساتەى کرماشان و سەرپێڵ زەهاو، یارسانەکانى پارێزگاى کرماشان وەک وەفایەک بۆ ئەم پیاوە ئینساندۆستە، هزاران نەمامى بەڕوویان چاندووە و هەڵمەتەکەیان بە ناوى ئەبووبەکر مەعرووفییەوە بەڕێوە بردووە.
