ناوەندی تۆمارکردنی بوومەلەرزەی پارێزگای کرماشان رایگەیاند، ئەمڕۆ لە ناوچەی قەسرشیرین ١٥ جار بوومەلەرزە روویداوە. تاوەکو ئێستا هیچ زانیارییەک لە ئەگەری زەرەر و زیانەکان بەهۆی بوومەلەرزەوە بڵاو نەبووەتەوە.
سەر لە بەیانیی ئەمڕۆ دووشەممە، ٨ی رێبەندانی ١٤٠٣، بوومەلەرزەیەک بە گوڕی 5.1 پلەی ریختەر قەسرشیرینی هەژاند، بوومەلەرزەکە لە پارێزگاکانی سنە، ئیلام و ناوچەکانی دیکەی پارێزگای کرماشانیش هەستی پێکرا.
ناوەندی تۆمارکردنی بوومەلەرزەی پارێزگای کرماشان بڵاوی کردەوە، دوای ئەو بوومەلەرزەیە ١٥ بوومەلەرزەی دیکەش روویداوە و گەورەترینیان 3.1 پلەی ریختەر بووە و مایەی نیگەرانیی نین.
فەرهاد فرووزی، بەڕێوەبەری ناوەندی تۆماری بوومەلەرزەی پارێزگای کرماشان، دەڵێت: روودانی بوومەلەرزە لەو قەبارەیەدا لە ناوچەکەدا شتێکی ئاساییە و لە پاشلەرزەکانیشدا شتێکی نائاسایی هەست پێنەکراوە.
دوای یەکەم بوومەلەرزە خەڵک لە ترسی لێکەوتەکانی یان روودانی بوومەلەرزەی بەهێزتر لە ماڵ دەرکەوتن و هاتنە سەر شەقام و نێو کۆڵانەکان.
خەڵکی ناوچەی رۆژئاوای پارێزگای کرماشان یادەوەری تاڵیان لە بوومەلەرزە هەیە. پاییزی ساڵی ٢٠١٧ بوومەلەرزەیەک بە گوڕی 7.3 پلەی ریختەر روویدا و لەودا لانیکەم ٦٢٠ کەس گیانیان لەدەستدا و نزیکەی ١٠ هەزار کەس بریندارە بوون. بوومەلەرزەکە زیانی بە ٧ شار و هەزار و ٩٣٠ گوند گەیاند.
مانگی سەرماوەزی ساڵی ٢٠١٨ بوومەلەرزەیەکی بەهێزی دیکە هەر لەو ناوچەیەدا روویدایەوە و لەودا ٧٧١ بریندار بوون و زیاتر لە ٤ هەزار خانوو زیانیان بەرکەوت.
