ڕاکەرە ماراتۆنییەکەى پیرانشار، لە شارەکەى خۆیەوە تا گڵکۆى مامۆستا ماملێ بە ڕاکردن ڕۆیشت وەک نیشانەیەک لە نیشتمانپەروەرى و دڵسۆزینیشاندانى خەڵکى پیرانشار بۆ ئەم هونەرمەندە گەورەیە کە جاشەکانى کۆمارى ئیسلامى گڵکۆکەیان تێک دا!
هێمن شێخە ڕاکەرى ماراتۆن و خەڵکى پیرانشار لە شارەکەى خۆیەوە پیرانشار تا مەهاباد بە "عەشقى ماملێ" ڕاى کرد و خۆشى لەم بارەوە گوتى: "کاتێک دڵ لەگۆڕێ بێت و عاشق بۆ سەرچاوەیەکى تایبەت، مرۆڤ داگیر بکات، مەبەست و ئامانجەکان هەمیشە نێزیک دەبنەوە".
شێخە باسی لەم هەنگاوەشى کرد و گوتى: "ئەم کارەى من لە ڕاستاى مەحکومکردن و دژایەتیکردنى بێ ڕێزییە بە گڵکۆى هونەرمەند و مامۆستاى مۆسیقاى فۆلکلۆرى کوردى محەمەدى ماملێ کە بەداخەوە لە لایەن چەند کەسێکەوە تێک درا".
سەبارەت بە بڕینى ئەو دوورییە و بڕینى دەیان کیلۆمەترییە، شێخە گوتى: "مەگەر دەکرێت بەرامبەر دژایەتى و بێڕێزی بە مامۆستاى مۆسیقى گەلى کورد و کەسایەتى دووبارەنەبووەوەى مامۆستا محەمەد ماملێ و بەتایبت ئاواز و گۆرانى نەمردى لایە لایەى مامۆستا، بێدەنگ بین و ئەو بێ ڕێزییە مەحکوم نەکەین، بۆیە من بڕینى ئەو هەموو مەودایەم بە ئەرک و بەرپرسیاریەتى خۆم زانیوە تا ئەم کارە گڵاوە مەحکوم بکەم و بە هەموویان بڵێم کە محەمەدى ماملێ تەنیا هى چین و توێژ و ڕەوتێکى تایبەت نەبووە و نییە، بەڵکو بە بڕواى من لەسەر هەموو کەسێکە کە ئەم جووڵە ناشایستەیە مەحکوم بکات و ئەم کارەى منیش سەلمێنەرى ئەوەیە کە هونەر و وەرزش و فەرهەنگ و مۆسیقا هەرگیز لەیەکترى جیا نین و بە شێوەى زنجیرئاسا پێکەوە بەستراونەتەوە".
شایەنى باسە شێخە نزیکەى ٤٠ میداڵى لە بوارى ماراتۆندا هەیە و یەکێکە لە کەسە نیشتمانپەروەرەکانى پیرانشار، کەچى کەمترین پشتیوانى لێ کراوە لە لایەن ڕژێمى کۆمارى ئیسلامییەوە و دواى تێکدانى گڵکۆى ماملێ، شێخە بە ڕاکردن گەیشتە مەهاباد و لە لایەن بنەماڵەکەى مامۆستا ماملێ پێشەوازییەکى گەرمی لێ کرا و وەک خۆى دەڵێت "پێشوازى ئەم بنەماڵە گەورەیە بۆ من بێ وێنە بوو هەرچەندە کە چاوەڕوانی وەها پێشوازییەکم لەوان نەبوو، چونکە من ئەم هەنگاوەم وەک ئەرک و بەرپرسیاریەتى خۆم ئەنجام داوە کە بە خۆشییەوە توانیم بە سەرکەوتووییەوە ئەنجامى بدەم".
