هاوکات لەگەڵ دەسپێکی ساڵی نوێی خوێندنی لە ئێران، ڕۆژی سێشەممە ٣ی ڕەزبەری ١٤٠٣ی هەتاوی هێزە ئەەمنییەتییەکان هێرشیان کردە سەر قوتابخانەی دواناوەندیی شاهێد لە جوانڕۆ و لە پێوەندی لەگەڵ بزووتنەوەی ژن، ژیان، ئازادی بۆ ماوەی چەند کاتژمێر، لێپرسینەوەیان لە ٩ قوتابیی ئەم قوتابخانەیە کرد و بەڵێننامەیان لێ وەرگرتن.
بە پێی هەواڵی گەیشتوو به ئاڤاتودەی، هێزە ئەمنییەتییەکانی وەزارەتی ئیتلاعات، ڕۆژی سێشەممە ٣ی ڕەزبەر، بە چەند ئۆتومبیلیەوه بە مەبەستی دەسبەسەرکردنی ٩ قوتابی، هێرش دەکەنە سەر قوتابخانەی داوناوەندیی کوڕانەی شاهێد لە جوانڕۆ، بەڵام دوابەدوای ئاڵۆزبوونی کەشی قوتابخانەکە و هاتنی بنەماڵەی قوتابییەکان بۆ قوتابخانە، لە ڕاگوستنیان بۆ ناوەندە ئەمنییەتییەکان پاشگەز دەبنەوە و لە کۆتاییدا قوتابییەکان دەبەنە دیوێکی قوتابخانەکە و لەوێ لێپرسینەویان لێ دەکەن.
سەرچاوەی هەواڵی ئاڤاتودەی ڕایگەیاند ئەم ٩ قوتابییە بۆ ماوەی چەند کاتژمێر لە پێوەندی لەگەڵ ناڕەزایەتییەکانی ١٤٠١ی هەتاوی، که سەرهەڵدانی ژن، ژیان، ئازادی بناوبانگه، لە نێو دیوێکی قوتابخانەکە لێپرسینەوە و هەڕەشەیان لێکراوە.
پێیان وتراوه ئەم قوتابخانەیە و هەندێ لە قوتابییان لە درێژەی ناڕەزایەتییەکاندا چەندین جار هەوڵی "چالاکی و ئاڵۆزی"یان داوە و بەم هۆیەوە بەڵێننامەی نووسراویان لێ وەردەگیردرێت.
پێویستە بگوترێ کە ئەم ٩ قوتابییە، لە درێژەی بزووتنەوەی ژن، ژیان، ئازادیشدا دەسبەسەر کرابوون و هێزە ئەمنییەتییەکان لە کاتی دەسبەسەرکردن و لێپرسینەوە لە نێو قوتابخانەدا پێیان وتوون ئێوە "کۆدتان هەیە و لەژێر چاوەدێریی ناوەندە ئەمنییەتییەکان"دان.
سەرچاوەی هەواڵی ئاڤاتودەی دەڵێ: ئەم کارەی ناوەندە ئەمنییەتییەکان لە سەرەتای ساڵی خوێندندا بەمەبەستی ترساندن و تۆقاندنی قوتابییانه".
