مانگی سووری ئێران ڕۆژی هەینی ڕایگەیاند ژمارەی ئەو کەسانەی بەهۆی سێڵاوەکانی ئەم دواییەی باشووری وڵات گیانیان لەدەستداوە، گەیشتووەتە حەوت کەس.
بەگوێرەی ڕاپۆرتە فەرمییەکان، بارانبارینی بەخوڕ و دروستبوونی سێڵاو لە پارێزگاکانی فارس، خووزستان و هورمزگان زیانی گیانیی لێکەوتووەتەوە، کە لەنێو قوربانییەکاندا دوو منداڵ هەن.
مانگی سووری ئێران ئاماژەی بەوە کردووە، لە ماوەی پێنج ڕۆژی ڕابردوودا لە ٢٤ پارێزگای وڵاتدا سەدان کەس بۆ ناوچە ئارامەکان گواستراونەتەوە و ژمارەیەکی دیکەش ڕەوانەی ناوەندە تەندروستییەکان کراون.
کۆمەڵەی مانگی سوور، بە ئاماژەدان بە بەردەوامیی هۆشداریی سووری کەشناسی لە باشووری ئێران، داوای لە هاووڵاتییان کردووە لە هاتووچۆی ناپێویست دووربکەونەوە و ڕێنماییەکان جێبەجێ بکەن. جەختیشی کردووەتەوە کە تیمەکانیان لە سەرانسەری وڵاتدا لە ئامادەباشیی تەواودان.
