باڵیۆزی کۆماری ئیسلامی لە موسکۆ ڕایگەیاند کە ڕەشنووسى گرێبەستی ۲۰ ساڵەی سەربازى، ئاسایش و ئابووریی کۆماری ئیسلامی لەگەڵ ڕووسیا ئامادە کراوە.
کازم جەلالی، باڵیۆزی کۆماری ئیسلامی ئێران لە موسکۆ، باسی لە ئامادەبوونی دەقێک بەناوی «لێکتێگەیشتنی پەیوەندییە دوولایەنەکان و هاوکاریی کۆماری ئیسلامی و ڕووسیا» بۆ ماوەی ۲۰ ساڵ بە ناوەرۆکی سیاسی، ئاسایشی، سەربازى، بەرگری و ئابووری کرد.
باڵیۆزی کۆماری ئیسلامی لە موسکۆ لە بەرنامەیەکی تەلەڤزیۆنیدا باسى لەوە کرد کە ئەم گرێبەستە بە چاودێریی ڕاستەوخۆی عەلی خامنه‌یی نووسراوە و ڕەشنووسى دەقەکەش لە باڵیۆزخانەی ئێران لە ڕووسیا بۆ وەزارەتی دەرەوە نێردراوە.
جەلالی گوتیشی ئەو نامه‌یەی عەلی خامنه‌یی بۆ ڤلادیمێر پۆتین نووسیویەتی و ئەو وەڵامەى که پۆتین داویەتییەوە، بابەتی وتووێژەکان بووە و ئەگەری هەیە گرێبەستە لە ٢٠ساڵیش درێژتر بکرێتەوە.
