محەمەد نەزەری ساڵی ١٣٧٣ بە تۆمەتی پەیوەندی لەگەڵ حیزبی دیموکراتی کوردستانی ئێران دەستبەسەر دەکرێ و سزای زیندانی تاهەتایی بەسەردا دەسەپێت.
ئەو زیندانییە سیاسییە کوردە بە بڵاوکردنەوەی نامەیەک ڕایگەیاندووە هێزەکانی ئیتلاعات گوشاریان خستووەتە سەر بنەماڵەکەی و ناهێڵن ئازاد بکرێت. ماڵپەری مافی مرۆڤی کوردستان نامەیەکی محەمەد نەزەری بڵاو کردووەتەوە.
نەزەری لە نامەکەیدا نووسیویەتی: دایکم ساڵی ٩٠ کە بە دوای دۆسیەکەم کەوتبوو و داوای کەمکردنەوەی سزاکەی کردبووم و تەنانەت سەردانی هەموو ئۆرگانەکان و ڕێکخراوەکان و ڕێبەری کۆماری ئیسلامیشی کردبوو پێیان گووتبوو: بڕۆ نزا بکە لە سێدارەمان نەدا.
ئەو بەندکراوە بە ڕاگەیاندنی ئەوەی ساڵی ١٣٨١ دادگای مەهاباد ڕەزامەندی دەربڕیبوو بە ئازادی مەرجداری ناوبراو، بەڵام کۆمیسیۆنی لێبوردن و بەخشینی تاران بە دەستێوەردانی وەزارەتی ئیتلاعات لە گرتووخانەی ڕەجایی شاری کەرەج ڕایگەیاند کە من مافی ئازادبوونم نییە و دژایەتی ئازادبوونیان کردم.
محەمەدی نەزەری لە درێژەی نامەکەیدا گووتویەتی: براکەم ساڵی ٩٥ و لە کاتێکدا بەدوای دۆسیەی من کەوتبوو، لە لایەن هەندێک لە ناوەندە ئەمنییەکانەوە هەڕەشەی لێکرابوو و لە کۆتاییدا تەرمەکەی وایان بڵاو کردەوە جەڵتە (سەکتە) لێیداوە، لە یەکێک لە ڕێگاکان دۆزرایەوە.
