ئاژانسی نێودەوڵەتی وزە ڕایگەیاند ڕێژەی فرۆشی نەوتی ئێران لە کاتی چوونە دەری ئەمریکا لە بەرجامەوە ملیۆنێک و حەوسەد هەزار بەرمیل کەمی کردووە.
بە پێی ڕاپۆڕتی ئەو ئاژانسە توانایی زێدە بەرهەمهێنانی نەوت لە ئاستی دونیادا سێ بەرابەری ئاستی هەناردەی کۆماری ئیسلامییە و سەرەڕای کەم بوونەوەی فرۆشی نەوتی ئێران بازاڕەکانی دونیا سەقامگیریان تێکناچێت.
ڕۆیتەرز بڵاوی کردۆتەوە ئاژانسی نێودەوڵەتی وزە لە پێگەی سەرەکی هەواڵی خۆی ڕایگەیاندووە سەرەڕای تەواو بوونی لێخۆش بوونەکانی ئەمریکا بۆ کڕیارانی نەوت ئێستا توانایی بەرهەمهێنانی زێدە بەرهەمی دونیا سێ هێندەى هەناردەی حکومەتی ئێرانە و بڵاوکردنەوەی نەوت لە دونیادا لە دۆخێکی باش دایە. کۆتاییهاتنی لێخۆشبوونەکان کاریگەری لەسەر هەناردەی نەوتی ئێران دەبێ، بەڵام سەقامگیری بازاڕەکانی دونیا تێک ناچێت.
ئاژانسی نێودەوڵەتی وزە بڵاوی کردووەتەوە ئاستی هەناردەی نەوتی ئێران لە مەودای زەمەنی نێوان خاکەلێوە هەتا بانەمەڕ ملیۆنێک و سەدهەزار بەرمیل بووە کە بە جیاوازی لە مانگی پێشوتری ٣٠٠ هەزار بەرمیل کەمی کردووە وبە جیاوازی لەگەڵ مانگی بانەمەڕى ساڵی ڕابردوو واتە ئەو کاتەی ئەمریکا لە بەرجام نەچووبووە دەر ملیۆنێک و حەوسەد هەزار بەرمیل کەمی کردووە.
