داخستنی سنوورەکانی کوردستان شەست هەزار کەسی ڕاستەوخۆ بێکار کردووە و ئەمەیش کاریگەریی نەرێنى لە سەر ژیانی ٦ میلیۆن کەس داناوە.
دوابەدوای مانگرتنی شارەکانی ڕۆژهەڵاتی کوردستان کە لە بانەدا بە ترۆپکی خۆی گەیشت و بۆ ماوەی ٢٥ رۆژ دووکانداران و کاسبکارەکان وازیان لە بازرگانى خۆیان بە نیشانەی نارەزایەتی بە داخستنی سنوورەکانی نیوان ڕۆژهەڵات و باشووری کوردستان داخست، دەسەڵاتداران تەنیا لە ڕیگەی ناردنی ئەم کورتەنامەیەى کە ئێمە لە وێنەکەدا بڵاومان کردووەتەوە، بە پیر داخوازییەکانى کاسبکارانى سەر سنوورەکان و خەڵکى هەژاری کوردستانەوە هاتن.
لەو کورتەنامەیەدا کە بۆ خەڵکی بانە نێردراوە، هاتووە" هاتنی شتومەکی هاوشێوەی شتومەکی نێوخۆیی واتە دابینکردنی هەلی کار بۆ بێگانەکان و بێکاربوونی کرێکاری ئێرانی". هەر پەیوەست بەم پرسەوە، ماوەیەک بەر لە ئێستا ڕیبەری کۆمارى ئیسلامى ئێران گوتبووی: بەرپرسانی ئەمنیەتی دەبێ بە توندترین شێوە ڕوبەڕڕووی ئەو کەسانە ببنەوە کە لە ڕێگەی سنوورەکانەوە شت هاوردەی ئێران دەکەن و شەڕی ئابووری وڵات دەکەن.
ڕۆژهەڵاتی کوردستان یەکێک لە دواکەوتووترین ناوچەکانی ئێرانە و کەمترین سەرمایەگوزاری لە لایەن حکومەتەوە لێکراوە، هەر ئەوەش وای کردووە خەڵکەکەی بۆ بژێوی ژیانیان ڕوو بکەنە سەر سنوورەکان و لە ڕێگەی پێشەی پڕ مەترسی کۆڵبەری و هاوردەکردنی شتومەک لە باشووری کوردستانەوە ژیانی خۆیان دابین بکەن.
لە ئێستادا حکومەت بە بیانووی گرینگیدان بە کەرتی نێوخۆی و پێشگرتن بە قاچاغ سنوورە نافەرمییەکانی ڕۆژهەڵات و باشووری کوردستانی داخستووە.
