لەم یەک دوو ڕۆژەى ڕابردوو ٤٦ ژەمە ڤاکسێنى دژە ڤایرۆسى کۆڕۆنا بە ناوەکانى (ڕیمدیسێڤیر ـ Remdesivir) و )ئاکتیمرا ـ Actemra)، لە ماڵى فەرمانبەرێکى نەخۆشخانەى ورمێ دەرهێنراون کە کاسپییان پێ کراوە و بە پارەیەکى زۆر و خەیاڵى فرۆشراون بە خەڵکى دیکە، ئەمە لە کاتێکدایە کە لە هەموو دونیا ڤاکسێنى دژە کۆڕۆنا بە خۆڕایی لە خەڵک دەدرێت.
بە هۆى فەرمانە نادروست و پیلاندارەکەى خامنەیی ڕابەرى کۆمارى ئیسلامى سەبارەت بە یاساغکردنى هاوردەکردنى ڤاکسێنى دژە کۆڕۆناى ئەمریکى و بەریتانی، زۆر کەس دەستیان بە کاسپى بە ڤاکسێنە دروستکراوەکانى خودى ڕژێم و هەندێک ڤاکسێنى دیکە کە گوایا دژى ئەو پەتایەن، کردووە.
ئەمە لە کاتێکدایە کە دەنگۆکان وا دەریدەخەن کە خودى کۆمارى ئیسلامى و سوپاى تیرۆریستى پاسداران لە پشتى ئەم کارانەوەیە و ئەمەش لاى خەڵک تەنیا گومان نییە، چونکە لە ماوەى ڕابردوو ئەم سوپایەى خامنەیی هەموو کارێکى کردووە بۆ بەتاڵکردنى گیرفانى خەڵک و کۆکردنەوەى سەرمایە بۆ هێشتنەوەى ڕژێمى دیکتاتۆرى ئاخوندى.
سەرهەنگ ئیرەج حەسەن خانى جێگرى فەرمانەى هێزە ئینتزامییەکانى ورمێ ماوەیەکى زۆر لە پاش بڵاوبوونەوەى دەنگۆى فرۆشتنى ڤاکسێنەکان لەو پارێزگایە و کەوتنە سەر زارى هەموو کەس، هەنگاوى هەڵێناوەتەوە بۆ ئەوەى دەست بەسەر ئەو بازاڕە ڕەشەدا بگیردرێت کە دەستى خۆیانى تێدایە، بەڵام وەک هاووڵاتییەکى شارەکە بە تۆڕى میدیایی ئاڤاتودەى گوت: ناچار بوون دواجار دەست بەکار بن، چونکە لاى هەموو خەڵکى بڵاو ببووەوە و نیگەرانى دروست کردبوو و تەنانەت پەنجەى گومان و تۆمەتبارکردنەکان ڕووەو سوپا و هێزە ئینتزامییەکانى کۆمارى ئیسلامى بوو.
لە ورمێ و زۆرێک لە شارەکانى دیکە هەندێک ڤاکسێن بە خودى ڤاکسێنە دروستکراوەکانى کۆمارى ئیسلامیشەوە بە بەهایەکى گەورە و گران بە خەڵکێک دەفرۆشرێت کە ترسى تووشبوون و لەدەستدانى کەسوکارى هەیە، هەرچەندە لە تارانى پایتەخت ئەم کاسپییەى نێو بازاڕى ڕەش زۆر گەورەترە لەمە و بەهاکانى ئەو جۆرە ڤاکسێنانەش کە هیچ ناوەندێکى پزیشکى ـ جیهانى تۆمارى نەکردوون، خەیاڵییە!
سەرهەنگ ئیرەج حەسەن خانى جێگرى فەرمانەى هێزە ئینتزامییەکانى ورمێ، باسى لەوە کردووە کە دوو کەسی تۆمەتباریان گرتووە بە فرۆشتنى ڤاکسێنەکە لە بازاڕى ڕەش کە یەکێکیان فەرمانبەرى نەخۆشخانەى ورمێیە و و ٤٦ ژەمە ڤاکسێنن کە بەهاکەیان ٥٠٠ پێنج ملیار ڕیاڵە!
