بە پێی زانیاری گەیشتوو بە تۆڕی میدیایی ئاڤاتودەی، لە ماوەی مانگی ڕابردوودا زیاتر لە ۲٠ پێشمەرگەی پارتی ئازادی کوردستان کە بە (پاک) ناسراوە، وازیان لەو حیزبە هێناوە و زۆرینەیان لە ڕێگەى قونسووڵیەى کۆمارى ئیسلامى ئێران، نامەی چوونەوە (برگە عبور)ـیان بۆ کراوە.
پارتى ئازادى کوردستان کە بارەگاکانى لەشارى هەولێرن و پێشمەرگەکانیشى لە شەڕى دژى داعش هاوکارى هێزەکانى پێشمەرگە بوون، ئەو ماوەیە ڕووبەڕووى چەندین ڕەخنە بووەوە لەوەى کە "ڕێگە نادەن هیچ پێشمەرگەیەک وازیان لێ بێنێت" و یا "ڕێگە نادەن دایک و باوکەکان منداڵە پێشمەرگەکانیان ببینن".
بە پێی ئەو داواکارییانەى کە لە لایەن دایک و باوکى چەندین پێشمەرگەى ئەو حزبەوە بە دەستى ئاڤاتودەى گەیشتووە (داواکارییەکانیان پارێزراوە)، داواى ڕوونکردنەوەى چارەنووسى منداڵەکەیان کردووە و ئێستاش زیاتر لە ٢٠ پێشمەرگەى کوڕ و کچ کە ناوەکانیان لاى ئاڤاتودەى پارێزراوە، وازیان لەم حیزبە هێناوە و چوونەتە قونسووڵیەى کۆمارى ئیسلامى لە هەولێر و داواى چوونەوەیان کردووە و ئەوانیش هەموو کارەکانی چوونەوەیان بۆ ڕایی کردوون و ناردوونیانەتەوە بۆ ڕۆژهەڵات.
سەرچاوەیەک بە ئاڤاتودەی گوت کە "پێشمەرگە کور و کچەکانی پاک بە گرووپ واز لەو پارتە دەهێنن و ئێران بە ڕێزەوە وەریان دەگرێتەوە بێ ئەوەی لێپرسینەوەیان لێ بکات یا زیندانییان بکات"، هەندێکیشیان هۆکاری ئەم وازهێنانەیان بۆ ڕەفتاری خراپ و توندی ئەو پارتە دەگەڕێننەوە کە ڕووبەڕووى دەبنەوە، وەک کچێکی پێشمەرگەیان باسى لێوە کردووە "نائینسانانە ڕەفتارمان لەگەڵ دەکرا و تەنانەت من دوو جار لێشیان داوم".
ئاڤاتودەى هەر لەم بارەوە پەیوەندى بە ڕێباز شەریفى بەرپرسى ئەمنیەت و ئاسایشى پارتى ئازادى کوردستانەوە کرد و بەڕێزیان گوتى "سەرلەبەرى ئەم هەواڵە ڕەت دەکەینەوە و دوورە لە ڕاستییەوە"، شەریفى سەبارەت بە قسەى دایک و باوکى ئەو پێشمەرگانەى کە ڕێگە بە بینینى منداڵەکانیان نادەن، گوتى "ڕاستە ڕەخنەى وا دەگیردرێت، ئەمە کارى ئیتلاعاتە کە دەیهەوێت خراپمان بکات، دەنا لاى ئێمە ئاساییە و هەموو دایک و باوک و بنەماڵەیەک دەتوانن بێن و سەردانى پێشمەرگەکانمان بکەن و لاشیان بمێننەوە"، بەڵام ئەمە لە کاتێکدایە کە چەندین بنەماڵە پەیوەندییان بە ئاڤاتودەیەوە کردووە کە بەرپرسانى پاک ناهێڵن منداڵەکانیان ببینن و تەنانەت سەردانى چەندی مەقەڕێکى پاکیان کردووە بەڵام وەڵامیان نەداونەتەوە.
سەبارەت بەوەى کە ئەوان توندڕەفتارى لەگەڵ پێشمەرگەکانیان دەکەن و ناهێڵن بچنەوە بۆ ئێران، ئەم بەرپرسەى ئەمنیەت و ئاسایشى پاک گوتى "ئێمەش هەروەک هەموو حیزبێک پرەنسیپ و یاسا و دیسیپلینى خۆمان هەیە، هەر کەسێک کە دێت بۆ پێشمەرگایەتى و خۆى ساغ دەکاتەوە بۆ خزمەتى کوردستان، نابێت لە دوو ساڵ کەمتر پێشمەرگایەتى بکات و کەمتر لەم ماوەیە ڕێگە بە هیچ کەسێک نادرێت کە واز بهێنێت"، ڕێباز ئەمەشى بۆ پرسى ئەمنیەتى و ئاسایشى خودى نێوخۆى پاک گەڕاندەوە کە "نابێت ڕێگە بدەین زوو شتەکانمانن ئاشکرا بن".
