تادێت گەمارۆ بانکییەکانى دونیا لەسەر کۆمارى ئیسلامى زیاتر دەبن
هەواڵدەرى ڕۆیتەرز بڵاوى کردەوە کە بەڵگەیەکى لەسەر گەمارۆى قورسى گەورەترین بانکى ژاپۆن لەسەر ئێران دەست کەوتووە.
بە پێى ئەو بەڵگەى هەواڵدەرى ڕۆیتەرز کە ڕۆژى پێنجشەممە بڵاوى کردەوە، گەورە بانکى تۆکیۆ میتسۆبیوشى یو ئێف جی ـى ژاپۆن، مامەڵەکردن لەگەڵ ئێران دەوەستێنێت. دەستپێکردنەوەى گەمارۆ ئابوورییەکانى ئەمریکا، هۆکارى ئەم وەستاندنى بازرگانییەى بانکەکەى ژاپۆنە لەگەڵ کۆمارى ئیسلامى.
لەسەر ئەم بنەمایە، بانکى ژاپۆن ئەم بڕیارەى بە کاربەرانى داوە و ڕایگەیاندووە کە سەودا و مامەڵەکردن لەگەڵ ناوەندە ماددییەکانى ئێران لە کۆتایی مۆڵەتە ١٨٠ ڕۆژەییەکەى ئەمریکا (٤ى نۆڤەمبەر)، سزادانى بەدواوەیە. لەسەر بنەماى بەڵگەکەى هەواڵدەریى ڕۆیتەرز، پێداچوونەوە بەم بڕیار و ڕوانگەیە لە سیاسەتە بانکییەکانى پەیوەستە بە ڕێکارە نوێیەکانى ئەمریکاوە.
