وەک بەشێک لە خەڵکى خاوەن زەویی کشتوکاڵى بۆ ئاڤاتودەیان نووسیوە، "دیاردەیەکی مەترسیدار لە شاری مەهاباد ماوەی دوو ساڵە هاتۆتە پێش کە ئەمجارە خەڵک خۆی رۆڵی سەرەکی دەگێڕێ و تا دێ بەرەو هەڵکشانە، ئەویش بە کرێدانی زەوییە بەپیتە کشتوکاڵییەکانى دەشتی شاروێرانە بە ئازەری زمانەکانی بناو و ملیکان و میاندواو".
ئەو کەسانەش بە پارەیەکی زۆر زەوییەکان بە کرێ دەگرن بۆ پیاز و گێزەر کە چەندین مەترسی خستۆتە سەر خەڵکی ناوچەکە بە گشتی یەک لەوانە:
یەکەم: بێکاربوونی کەسانی خۆجێیی ناوچەکە و رێگەی کاسبیکردنیان گیراوە و ناتوانن بەربەرەکانی ئەوان بکەن
دووەم: بەهۆی بەکارهێنانی جۆرێک ژەهرى دانەکووژ، خاکەکە نەزۆک دەکەن و تا چەند ساڵ دواتریش هیچ جۆرە گیا و بەرهەمێکی تر ناڕوێنێت.
سێیەم: بەهۆى هاتنى ئەوانە بۆ نێو دەشت و مەزراکانی ناوچەی شاروێران ڕادەی ئەمنیەت زۆر دابەزیوە و بە هۆی وەی کە بازگەی سێرای دارەلەک هەموو خەڵکی میاندواو تا بناون زۆر بە ئاسانی پێکەوە بۆ دەستدرێژیکردن بۆ سەر سامانی خەڵک هاوئاهەنگ دەبن و هەر بۆئەوەشە ئێستا زۆربەی دێهاتەکان خۆیان چاودێری بۆ نێو دێیەکان دادەنێن لە ترسی دز و چەتە،
بەم کارەش و لەبەر هەژارى خەڵکەکە و بەکرێدانى زەوییە کشتوکاڵییەکان بە پارەى باشتر بە خەڵکى دەرەوەى شارەکە و بێگانەکان، نزیکەی ۲۰۰ هێکتار زیاتر کەوتۆتە ژێر دەستی ئازەرییەکان و زۆر جێگا هەیە کە وەرزێری کورد بۆتە کەمینە و یا هەر لێی نییە. ئەمەش لە درێژماوەدا جۆرێک تکریتکردن کە زۆر بە ئاسانی و بێدەنگی خەریکی تەشەنەکردنە.
