![کۆمەڵى ئیسلامى لە ڕۆژهەڵاتى کوردستان خەریکى ڕێکخستنە](/sites/default/files/2019-05/%D8%B9%DB%95%D9%84%D9%89%20%D8%A8%D8%A7%D9%BE%DB%8C%D8%B1%20%D9%88%20%DA%A9%DB%86%D9%85%DB%95%DA%B5%D9%89%20%D8%A6%DB%8C%D8%B3%D9%84%D8%A7%D9%85%D9%89.jpg)
بە پێى زانیارى گەیشتوو بە تۆڕى میدیایی ئاڤاتودەى، کۆمەڵى ئیسلامى کوردستان کە عەلى باپیر لە باشوورى کوردستان ڕابەرایەتى دەکات و حزبێکى ئیسلامى توندئاژۆیە، لە شارى تازاواى سەلاسى باوەجانیی پارێزگاى کرماشانى ڕۆژهەڵاتى کوردستان خەریکى پڕوپاگندە و کارى ڕێکخستن و ئەندامگیرى دەکەن.
دانیشتوویەکى شارى تازاوا بە ئاڤاتودەى گوت "ترسى ئەوەمان هەیە کە ئەم پڕوپاگندە و ئەندامگیرییەى کۆمەڵى ئیسلامى، بە هاوکارى کۆمارى ئیسلامى بێت بۆ ئەوەى لە پاشەڕۆژ ببنە دژبەرى حزبەکانى ڕۆژهەڵاتى کوردستان بکەن و بۆ دژایەتى نیشتمانپەروەرەکان گۆڕەپانەکەیان بۆ بکەنەوە". چالاکێکى فەرهەنگى شارەکەش گوتى"لە پڕوپاگندەکانیشیاندا لە مزگەوتەکان عەلى باپیرى کۆمەڵى ئیسلامى وەک کەسێکى موقەدەس و کوردێکى موسڵمان و ڕابەرى ڕاستەقینەى گەلى کورد نیشان دراوە".
ئەمە لە کاتێکدایە کە عەلى باپیر و حزبەکەى لە باشوورى کوردستان چەندین تۆمەتى تیرۆریستییان دراوەتە پاڵ و وەک حزبێکى توندئاژۆى ئیسلامى ناسراوە.
شایەنى باسە، کەناڵى ئاسمانى پەیام کە کەناڵى کۆمەڵى ئیسلامییە، چەندین ڕاپۆرتی لەگەڵ ئەنجوومەنە فەرهەنگییەکانى شارى بۆکان و پیرانشار ئەنجام داوە و هەوڵى داوە کە لەم ڕێگەیەوە سەرنجى لاوانى ڕۆژهەڵات بۆ خۆى ڕابکێشێت. هەرچەندە لە کارنامەى کۆمارى ئیسلامیدا شتى لەم شێوەیە نامۆ نییە و لە ماوەى چل ساڵى ڕابردوودا بە دروستکردن و ڕێگەواڵاکردن بۆ گرووپەیلى تیرۆریستى و توندئاژۆی ئیسلامى، هەوڵى لاوازکردنى بەرەى نیشتمانپەروەران و حزبەکانى ڕۆژهەڵاتى کوردستانى داوە لەم ماوەیەشدا کە گێرمەوکێشەکانى نێوان ئەمریکا و ڕژێمى ئێران گەیشتوونەتە چڵەپۆپە، سوپاى پاسداران چەندین فەیلەق و هێزى بریکارەکانى خۆى وەک فاتمیون و زەینەبیوون و حیزبوڵاى لوبنان و حەشدى شەعبی بردووەتە نێو خاکى ئێرانەوە بۆ ئەوەى لە ئەگەرى هەر ڕووداو و ڕاپەڕینێکدا بۆ سەرکوتى خەڵکى ئازادیخواز و شۆڕشگێڕى گەلانى ئێران بەکاریان بهێنێت.