محەمەد حوسێن سادقی دادوەری گشتیی پارێزگاى کرماشان ڕۆژی یەکشەممە ٢٩ بانەمەڕ لە نامەیەکدا بۆ وەزارەتی ئیرشادی ئەو پارێزگایە، ناڕەزایەتی خۆی بە کتێبفرۆشی کچان دەربڕیوە و هۆشداری داوەتە وەزارەتی ئیرشاد.
لە نامەکەدا هاتووە "شێوەکانی بڵاوکردنەوەی کتێب و فرۆشتنی، بە پێی شەرع و ئەخلاق و ڕێوشوێنە قەبوڵکراوەکان جێگەی پەسەند نییە. کۆمەڵێک کچی لاو بە هەڵگرتنی کتێب بە مەبەستی فرۆشتن، سەردانی ئیدارەکان و تەنانەت ماڵی خەڵک دەکەن و بە تکا و پاڕانەوە هەوڵی فرۆشتنی کتێب دەدەن. ئەو دیمەنە جێگەی نیگەرانییە و ناحەزە و دژی فەرهەنگی گشتیی کۆمەڵگەیە و بەستێنی خەساری ڕەفتاری درووست دەکات".
کۆماری ئیسلامی دژایەتی چالاکی فەرهەنگی و وەرزشی ژنان دەکات و لە دوایین حاڵەتدا دادوەری گشتی ئیسفەهانیش ڕێگەى ڕووبەڕووبوونەوەی تووندی بە هێزی ئینتیزامی دابوو لەگەڵ ئەو ژنانەی پاسکێل سواری دەکەن.
