تورکیە لە کاتژمێر ٤ى ڕۆژى چوارشەممەوە تا ئێستا بە بەردەوامى لە ئاسمان و لە زەوییەوە خەریکى بۆمباران و تۆپبارانى ڕۆژئاواى کوردستان و ناوچەکانى ژێر دەسەڵاتى هێزەکانى سوریەى دیموکرات (هەسەدە)یە و لەو ماوەیەدا بە هەزارن کەس ئاوارە و بریندار و بە سەدان کەس گیانیان لەدەست داوە کە زۆینەیان ژن و منداڵن.
عیسمەت شێخ حەسەن سەرۆکی ئەنجوومەنی سەربازی کۆبانی هەر ئەمڕۆ گوتى "ڕێگە دەدەین سوپای ڕژیمی سوریە و ڕوسیە لە پێناو پاراستنی گیانی هاووڵاتیان بێنە نێو هەردوو شاری کوبانی و منبج"، دواتر گلەییشى لەسەر ئەوە کرد کە "بانگەوازمان لە هەموو وڵاتانى نێودەوڵەتى و عەرەبی و تەنانەت کۆمکارى عەرەبیش کرد. کەس نەیتوانى بێتە هانامانەوە. کاتێک گوتمان کورد کەس پشتى نییە و دەبێت خۆمان پشتیوانى یەکترى بن، کەس بڕواى پێمان نەکرد. دەبینن هێرش دەکەنە سەرمان و پێمان دەڵێن ناتوانین پشتگیرى ئێوە بکەین"، لە کۆتاییشدا ڕاستەوخۆ لەسەر ئەو هۆکارانەى پێشوو گوتى "بۆیە ئێستا لەگەڵ سوریە و ڕووسەکان ڕێک دەکەوین".
ئەمڕۆش لە چوارچێوەى ئۆپەراسيۆنەکەى "كانى ئاشتی" میلیشا تیرۆریستەکانى سوریا کە تورکیا پشتیوانییان لێ دەکات ڕۆژئاوای شارى گرێ سپییان کۆنتڕۆڵ کرد و خەریکى پێشڕەوین. ئێستا سوپاى تورکیە و میلشیا تیرۆریستەکانى سەر بە تورکیە لە پێشڕەویدان و سوپاى بەشار ئەسەدیش دەستى بە جووڵە کردووە!
