لە نوێترین هەوڵی شەڕی نەرمی دەزگا ئەمنیەکانی کۆماری ئیسلامی لە دژی هێزی پێشمەرگەی کوردستان و بنەماڵەکانیان، ئیتلاعاتی کۆماری ئیسلامی سەردانی بنەماڵەی پێشمەرگەی حیزبە کوردیەکان دەکا و پێیان دەڵێ لە ئەگەری فرۆشی ماڵ و مڵکتان بەشی منداڵە پێشمەرگەکانیان دەبێ بدەن بە دەوڵەت و وەزارەتی ئیتلاعات.
ئیتلاعاتی کۆماری ئیسلامی بە بنەماڵەی پێشمەرگەکان لە ناوخۆی ڕۆژهەڵاتی کوردستانی ڕاگەیاندووە چ بە شێوەی پوڵی کاش بێ و چ بە شێوەی مڵک بێ دەبێ بەشی ئەو منداڵانەتان کە ئێستا لە ڕیزی حیزبە کوردیەکاندان و پێشمەرگایەتی دەکەن بدەن بە دەوڵەت.
لە چەندین حاڵەتدا هێزە ئیتلاعاتییەکان دوای ئەوەی زانیویانە بنەماڵەیەکی پێشمەرگە وەرسەی ڕاست کردووەتەوە و میراتی دابەشکردووە، چوون و دوای دانانی بەهای ماڵ و دارایی ئەو ماڵە پوڵی کاش و هەروەها کەرەسەی ناو ئەماڵەکەیان کە بەشی ئەندامی پێشمەرگەی ئەو ماڵە بووە، دەگەڵ خۆیان بردووە.
بنەماڵەی پێشمەرگە دژی ئیتلاعاتییەکان وەستاونەوە
ئەو کارەی دەزگای ئیتلاعات بووە بە هۆی توڕەبوونی بنەماڵەی پێشمەرگەکانی کوردستان و چەندین بنەماڵە خۆیان بواردووە لە دانی بەشە ماڵی منداڵە پێشمەرگەکانیان بە ئیتلاعات و هەڕەشەیان لێکردوون کە ئەگەر واز نەهێنن ئەوە میدیاکان لەو کارەی ئیتلاعات ئاگادار دەکەنەوە و کۆبوونەوەی ناڕەزایەتی پێک دێنن.
دوای هەڕەشەی ئەو بنەماڵانە هێزە ئیتلاعاتییەکان لە هێندێک شوێن ترساون و بەو مەبەستە سەردانی بنەماڵە پێشمەرگەکانیان نەکردووەتەوە.
