پڕۆژەى سووکایەتیکردن بە کەسایەتییە فەرهەنگی و ئازادیخوازەکان لە لایەن کۆمارى ئاخوندى و لە ئێرانى داگیرکراو، هەردەم پرسێکى باوى دژەئینسانى بووە و لە دواى ڕاپەڕینە سەراسەرییەکانى گەلانى ئێرانیشەوە، ئەم پرسە زیاتر پەرەى سەندووە. لە نوێترین نمونەشدا، گۆڕینى ناوونیشانى مامۆستایەکى هەڵگرى بڕوانامەى دکتۆراى دەروونناسییە بۆ کۆگادار (ئەنباردار)ى قوتابخانە.
دکتور محەمەدڕەزا ڕەئیسى کە لە ڕابردوو و لە کاتى دەسەڵاتى دەوڵەتەکانى پێشوو چەندین جار خراوەتە بن پاڵەپەستۆ و مافى پێشێل کراوە، ئەم جارەیان لە بەشى ٢ى شارى ڕەى، پلەکەى لێ سەندراوەتەوە و لە ڕووى کارگێڕییەوە بە شێوەیەکى نایاسایی دابەزێنراوە بۆ پلەى "کۆگادار" و پاش ٣ مانگ خزمەت، مووچە کەمەکەشیان لێ داگیر کردووە.
بە پێى ئەو بەڵگانەى لە دەستى ئەنجوومەنى هەماهەنگى ڕێکخراوە سنفییەکانە و دەست تۆڕی میدیایی ئاڤاتودەى کەوتووە، دکتور محەمەدڕەزا ڕەئیسى سەرەڕاى بوونى چەندین ساڵ پێشینەى کارى و بە هۆى پاڵەپەستۆى حەراسەتى بەڕێوەبەرایەتیی گشتیی پەروەردە و فێرکردنى شارستانەکانى تاران، ناچارکراوە پۆستى کۆگادار بە مووچەکى زۆر کەمی مانگانەى ٥ ملیۆن و نیو تمەن وەربگرێت و ئێستاش ئەم مووچە کەمەشیان لێ داگیر کردووە.
پێویست بە بیر خستنەوەیە کە ئەم مامۆستایە، لە ساڵانى ڕابردوو چەندین جار دەرکراوە و سزا دراوە، بەڵام دواجار توانى بە ڕەئی دادگاى تێهەڵچوونەوە حوکمەکەى پێشووى هەڵوەشێنێتەوە و بگەڕێتەوە سەر کارەکەى. دکتور محەمەدڕەزا ڕەئیسى کە لە ساڵى ١٣٨٨ى هەتاوییەوە ئازار و ئەزیەت دەدرێت، دوور خرابووەوە بۆ دەوروبەرى شارى ڕەى وەک "دەفتەردار" کارى پێ دەکرا و سەرەڕاى دامەزراندنى بە شێوەی فەرمى، تا ئێستا بە هۆى ڕوانگە ڕەخنەگرە سیاسییەکانى و ڕاپۆرتە ساختەکانى حەراسەت، دوو جار کەوتووەتە بەر تاقیکردنەوەى عەقیدەتی و دەرکردن.
دکتور محەمەدڕەزا ڕەئیسى، پێشینەى چالاکى و کارکردنى لە ئەنجوومەنى ئیسلامى زانکۆى عەلامەى تەباتەبایی و جووڵانەوەى سەوزی هەیە و هەر لەبەر ئەمەشە چەندین ساڵە ڕووبەڕووى کینە و کارشکێنی و فشار و پاڵەپەستۆى ناوەندە ئەمنییەکانى کۆمارى ئیسلامى بووەتەوە.
بە پێى ڕاپۆرتى گەیشتوو، بەڕێوەبەرانى شارى ڕەى بە دکتور محەمەدڕەزا ڕەئیسییان گوتووە "هەرگیز ڕێگە نادەن وەک مامۆستا و بە بڕوانامەى دکتۆراوە لەو بەشەى ئەوان کار بکات و دەبێت تەنیا وەک کۆگادارێک بمێنێتەوە".
لە هەیکەلى کارگێڕیی مامۆستایەتیدا، پلەى کۆگادار، پلەیەک لە سەرووى خزمەتگوزار (فەڕاش)ـەوە پێناسە کراوە و ناوەندە ئەمنییەکانیش بە دەستى ئەنقەست و وەک سووکایەتى و شکاندنی کەسایەتی دکتور محەمەدڕەزا، ئەم پلەیەیان پێ بەخشیوە و ئێستا ئەم دکتۆرە لە بوارى دەروونییەوە لە ژێر پاڵەپەستۆ و فشارێکى گەورەدایە.
